बीड जिल्ह्यात धक्कादायक घटना घडली आहे. मुख्यमंत्री एकनाथ शिंदे यांच्या वैद्यकीय मदत कक्षाचे जिल्हा समन्वयक विलास मस्के यांच्यावर प्राणघातक हल्ला करण्यात आला आहे. या हल्ल्यात मस्के गंभीर जखमी झाले असून त्यांची प्रकृती चिंताजनक असल्याचे डॉक्टरांनी सांगितले आहे. मिळालेल्या माहितीनुसार, मस्के यांच्या पालवन येथील घरी मध्यरात्री पाच ते सहा अज्ञात हल्लेखोरांनी धाड टाकली. धारदार शस्त्राने केलेल्या या हल्ल्यात विलास मस्के गंभीर जखमी झाले तर त्यांच्या बहिणी भाग्यश्री सोजे यांच्या हातावरही वार करण्यात आला. मस्के गेल्या तीन वर्षांपासून बीड वैद्यकीय मदत कक्षाचे कामकाज पाहत असून युवा सेनेचे मराठवाडा निरीक्षक बाजीराव चव्हाण यांच्या सोबत ते कार्यरत आहेत. सध्या ते जबाब देण्याच्या स्थितीत नसल्याने अद्याप गुन्हा दाखल करण्यात आलेला नाही.

सध्या बीड शहरातील गिताई हॉस्पिटलच्या अतिदक्षता विभागात त्यांच्यावर उपचार सुरू असून डॉक्टरांनी त्यांची प्रकृती गंभीर असल्याचे सांगितले आहे.