मुख्यमंत्री देवेंद्र फडणवीस हे आज क्रांतिवीर खाज्याजी नाईक यांच्या स्मारकाच्या अनावरणाप्रसंगी जळगाव जिल्ह्याच्या दौऱ्यावर आले होते. यावेळी राष्ट्रवादी शरद पवार गटाचे जेष्ठ नेते एकनाथ खडसे आणि देवेंद्र फडणवीस यांची भेट होण्याची शक्यता वर्तवली जात होती. क्रांतिवीर खाज्याजी नाईक स्मारक अनावरणाच्या कार्यक्रमाला एकनाथ खडसे दाखल झाले. मात्र देवेंद्र फडणवीस यांच्याशी त्यांची भेट झाली नाही. यावर एकनाथ खडसे यांनी प्रतिक्रिया दिली आहे.

ते म्हणाले की, मुख्यमंत्री देवेंद्र फडणवीस यांच्यासोबत माझी भेट होणार होती, हे खरे नाही. कार्यक्रमाच्या निमित्ताने मी कार्यक्रमाला उपस्थित राहिलो. औपचारिकरित्या जर भेट झाली तर भेट घेईल असा माझा प्रयत्न होता. हा कार्यक्रम शासकीय नव्हता हा राष्ट्रीय स्वयंसेवक संघाचा कार्यक्रम होता. या कार्यक्रमात राजकीय चर्चा होईल, अशी अपेक्षा होती. मी कार्यक्रमाला उपस्थित होतो व या कार्यक्रमाला मला आग्रहपूर्वक बोलावण्यात आले होते असे त्यांनी सांगितले.