सांगली: डबल महाराष्ट्र केसरी आणि शिवसेना उद्धव ठाकरे गटाचे नेते चंद्रहार पाटील यांचा शिवसेना शिंदे गटात प्रवेश होण्याची चर्चा काही दिवसांपासून सुरू आहे. मागील दोन दिवसाआधी सांगलीच्या भाळवणीमध्ये उद्योग मंत्री उदय सामंत यांच्या उपस्थितीमध्ये चंद्रहार पाटलांनी बैठक आयोजित केली होती. त्यावेळी चंद्रहार पाटलांकडून मंत्री सामंत यांना चांदीची गदा देखील भेट देण्यात आली होती.

चंद्रहार पाटील हे शिवसेना उद्धव ठाकरे गटाचे सांगली लोकसभा निवडणुकीतील उमेदवार होते. तर गेल्या काही दिवसांपासून चंद्रहार पाटील हे उद्धव ठाकरेंची साथ सोडून एकनाथ शिंदेंच्या शिवसेनेत प्रवेश करणार अशा चर्चा सुरू आहे, या सर्व पार्श्वभूमीवर पैलवान चंद्रहार पाटील यांच्या भाळवणी गावात मंत्री उदय सामंत यांच्या उपस्थितीत झालेला कार्यक्रम,हा चंद्रहार पाटील यांचा शिवसेना शिंदे गटात प्रवेश करणार असल्याचे मानले जात होते. यानंतर आज चंद्रहार पाटील यांनी याबाबत ट्विट करत माहिती दिली आहे. तसेच आगामी काळात डबल केसरी पहिलवान कोणत्या पक्षाची गदा हातात घेता हे बघणं महत्वाचे ठरणार आहे.