सरपंच संतोष देशमुख यांच्या हत्येचा मुख्य आरोपी वाल्मीक कराड हा धनंजय मुंडे यांचा कार्यकर्ता आहे. तसेच ढाकणे कुटुंबाला मारहाण केल्याचा व्हिडिओ व्हायरल झाल्यानंतर सतीश उर्फ खोक्या भोसलेचे अनेक गुन्हे समोर आले. हा खोक्या देखील भाजप आमदार सुरेश धस यांचा कार्यकर्ता आहे. अशातच बीड मधील एकेक गुन्हेगारी समोर येत असतानाच राज्याचे माजी गृहमंत्री तसेच महायुतीचे आमदार दिलीप वळसे पाटील यांनी आपल्या सरकारमधील काही नेत्यांवर अप्रत्यक्षपणे निशाणा साधला आहे. वळसे पाटील म्हणाले, खेड्यापाड्यासह शहरात पिस्तूल कोयत्याने हल्ले होत असताना ही प्रवृत्ती कशी वाढते, असा मला प्रश्न पडलाय तरुणाईच्या हाताला काम नाही, नोकरी नाही म्हणून लग्न देखील जमत नाही. यातून तरुणाई नैराश्यात गेली आहे. आणि हीच तरुणाई गुन्हेगारीकडे वळत आहे. आणि त्यामध्ये आम्ही राजकीय लोक भर घालत आहोत अशी कबुलीच माजी गृहमंत्री दिलीप वळसे पाटील यांनी आपल्या भाषणाच्या वेळी दिली.