राष्ट्रवादी अजित पवार गटाचे उमेदवार धनंजय मुंडे आज परळी विधानसभा मतदारसंघातून उमेदवारी अर्ज दाखल करणार आहेत. 2019 साली परळीतून धनंजय मुंडे निवडून आले होते. त्यामुळे महायुतीत परळी विधानसभा मतदारसंघ अजित पवार गटाकडे आहे. आज उमेदवारी अर्ज दाखल करण्यापूर्वी पंकजा मुंडे यांनी धनंजय मुंडे यांचं औक्षण केलं. त्याच बरोबर धनंजय मुंडे यांच्या अर्जावर सूचक म्हणून सही देखील पंकजा मुंडे यांनी केली आहे. त्यामुळे या दोन्ही भावाबहीणीची सध्या परळीत चांगलीच चर्चा रंगली आहे.

यावेळी पंकजा मुंडे यांनी माध्यमाशी बोलल्या. ''महायुतीची यादी जवळपास जाहीर झाली आहे. धनंजय मुंडे यांची सूचक म्हणून बहिण म्हणून मी उपस्थित आहे. सूचक म्हणून मी सही केलेली आहे. धनंजय मुंडे यांना शुभेच्छा देते. ही निवडणूक त्यांना सोपी जावी. चांगल्या मतांनी त्यांना विजय मिळावा. या मतदारसंघात परंपरागत आमच्या परिवाराने सेवा केली आहे, तशी त्यांनी सुद्धा सेवा करत रहावी'' असं पंकजा मुंडे म्हणाल्या. यावेळी त्या धनंजय मुंडे यांच्या शक्तीप्रदर्शन रॅलीमध्ये देखील सहभागी झाल्याचं दिसून आलं.

Edited By Rakhi Rajput