सरपंच संतोष देशमुख यांच्या निर्घृण हत्येला तीन महिने उलटूनही मुख्य आरोपी कृष्णा आंधळे हा अद्याप पोलिसांच्या हाती लागलेला नाही. त्यामुळे संतोष देशमुख यांचे बंधू धनंजय देशमुख यांनी पोलिसांवर गंभीर आरोप केले आहेत.

9 डिसेंबर 2024 रोजी संतोष देशमुख यांची हत्या करण्यात आली होती. या प्रकरणी सात जणांना अटक करण्यात आली असली, तरी मुख्य सूत्रधार कृष्णा आंधळे हा अद्याप फरार आहे. पोलिसांनी महाराष्ट्रासह इतर राज्यांमध्ये त्याचा शोध घेतला, मात्र त्याचा ठावठिकाणा लागलेला नाही.

धनंजय देशमुख यांनी आरोप केला की, कृष्णा आंधळे आणि त्याच्या टोळीने यापूर्वीही अनेक गुन्हे केले आहेत. मात्र, त्याला राजकीय आश्रय मिळाल्यामुळे तो खुलेआम गुन्हे करत होता. आंधळे फरार झाल्यानंतरही तो काही पोलिसांसोबत होता, त्यामुळे त्या पोलिसांनाही सहआरोपी करण्यात यावे, अशी मागणी देशमुख यांनी केली आहे.