राज्याच्या उपमुख्यमंत्री सुनेत्रा अजित पवार यांनी आज कराड येथील प्रितीसंगमावर महाराष्ट्राचे शिल्पकार आणि पहिले मुख्यमंत्री स्वर्गिय यशवंतराव चव्हाण यांच्या समाधीस्थळी पुष्पचक्र अर्पण करून अभिवादन केले. राजकारणात आणि समाजकारणात यशवंत विचार रुजवण्यासाठी कार्यरत असणाऱ्या पवार कुटुंबाची परंपरा पुढे नेण्याच्या उद्देशाने सुनेत्रा पवार यांनी यशवंतराव चव्हाण यांच्या समाधीला अभिवादन केले. अभिवादनानंतर त्या स्वर्गीय अजित पवार यांचे अंगरक्षक असलेले विमान दुर्घटनेत मृत्युमुखी पडलेल्या विदिप जाधव यांच्या सातारा जिल्हातील गावाला भेट देणार आहेत.

उपमुख्यमंत्री सुनेत्रा पवार यांनी उपमुख्यमंत्रीपदाची शपथ घेतल्यानंतर प्रथमच कराड येथे येऊन स्वर्गिय यशवंतराव चव्हाण यांच्या समाधीचे दर्शन घेऊन पुष्पचक्र अर्पण केले. राज्याचे माजी उपमुख्यमंत्री स्वर्गिय अजित पवार यांचे आणि स्वर्गिय यशवंतराव चव्हाण यांच्या समाधी स्थळाचे नातेही अत्यंत जिव्हाळ्याचे होते. ते वारंवार कराड येथे येऊन स्वर्गीय यशवंतराव चव्हाण त्यांच्या समाधीचे दर्शन घेऊन अभिवादन करत होते. त्यांची आठवण यावेळी उपस्थितांना झाली. यावेळी मदत व पुनर्वसन मंत्री मकरंद पाटील, राज्य महिला आयोगाचे अध्यक्ष रूपाली चाकणकर, खासदार सुनील तटकरे, खासदार नितीन पाटील, माजी खासदार श्रीनिवास पाटील, माजी आमदार बाळासाहेब पाटील उपस्थित होते.