देशभरात आज दसऱ्याचा उत्साह पाहायला मिळत असताना राजधानी दिल्लीत यंदाच्या रावणदहन सोहळ्याची विशेष चर्चा रंगली आहे. रावण, कुंभकर्ण आणि मेघनाद यांच्या पुतळ्यांसोबत तब्बल ३० फूट उंच झुरळाच्या पुतळ्याचेही दहन करण्यात येणार आहे. पितमपुरा येथील श्री केशव रामलीला समितीने हा अनोखा उपक्रम आयोजित केला आहे.

दसऱ्याच्या दिवशी वाईटावर चांगल्याचा विजय झाल्याचे प्रतीक म्हणून रावणदहन केले जाते. मात्र, यंदा दिल्लीतील या सोहळ्यात झुरळाचा पुतळाही लक्षवेधी ठरणार आहे. स्वच्छतेचा संदेश देण्याच्या उद्देशाने या उपक्रमाचे आयोजन करण्यात आल्याचे सांगितले जात आहे. गेल्या काही दिवसांपासून देशभरात कॉकरोच जनता पार्टी चर्चेत असून मोठ्या प्रमाणात अभिजीत दीपके यांना तरुणाईचा पाठिंबा मिळत आहे. मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी दिल्लीमध्ये कॉकरोच जनता पार्टी आक्रमक झालीय तर दुसरीकडे झुरळाचे दहन करत CJP ला डिवचल्याचे बोलले जात आहे.