मुंबई : विधानसभा निवडणूक जाहीर झाल्यानंतर भाजपनं 99 उमेदवारांची यादी जाहीर करत कुरघोडी केली. भाजपने या यादीत शिवसेनेच्या ताब्यात असणाऱ्या 5 जागांवरही उमेदवार जाहीर केले. मात्र, भाजपच्या या पवित्र्याने शिवसेना शिंदे गट नाराज झालाय..शिवसेनेला विचारात न घेता भाजपने जाहीर केलेल्या यादीबाबत कालच्या बैठकीत नाराजी व्यक्त करण्यात आल्याची माहिती सूत्रांनी दिली.

जागा वाटपावरून महाविकास आघाडीत वाद सुरू असल्याचे दिसतंय... तर, दुसरीकडे महायुतीत सगळं काही आलबेल असल्याचा दावा केला जात होता. मात्र, महायुतीमध्येही नाराजीनाट्य सुरू असल्याचं दिसतंय.

भाजपविरोधात शिंदे गटात नाराजी?

1. कल्याणात भाजपची सुलभा गायकवाडांना उमेदवारी

2. कल्याणात शिंदेंच्या शिवसैनिकांचा सोडचिठ्ठीचा इशारा

3. ठाण्यात भाजपकडून संजय केळकरांना उमेदवारी

4. ठाण्यात भाजपच्या केळकरांविरोधात मिनाक्षी शिंदेंचं बंड

5. भाजपची धुळे, अचलपूर, उरण, नालासोपारा, देवळीत उमेदवारी

भाजपचे आमदार गणपत गायकवाड गोळीबार प्रकरणानं कल्याण पूर्वेत निवडणुकीपुर्वीच शिंदे-भाजप गटात फुट पडली. मात्र महायुतीतील मोठा भाऊ भाजपनं कुरघोडीचं राजकारण करत गायकवाडांच्या पत्नीला उमेदवारी दिल्यानं शिंदेंच्या शिवसैनिकांची नाराजी उफाळलीये. कमी अधिक प्रमाणात राज्यात हीच स्थिती असल्याचं चित्र आहे. त्यामुळे नाराजांना कसं राजी करायचं आणि बंडोंबांना कसं थंड करायचं हा पेच शिंदेंना सोडवावा लागेल अन्यथा महायुतीत बेबनाव अटळ आहे.