मनोज तांबे, भाईंदर | साम टीव्ही

भाजप आमदार नरेंद्र मेहता यांच्या कुटुंबाशी संबंधित मीरा रोड येथील सेव्हन स्क्वेअर अकॅडमी शाळेला शिक्षण विभागाने कारणे दाखवा नोटीस बजावली आहे. पर्यूषण पर्वाच्या पार्श्वभूमीवर विद्यार्थ्यांच्या डब्यात कांदा, लसूण, बटाटा, बीट यांसारखी कंदमुळे न आणण्याच्या सूचनेवरून वाद निर्माण झाला होता. आता दोन दिवसांत लेखी खुलासा देण्याचे आदेश शिक्षण विभागाने दिले आहेत.

पर्यूषण पर्वात विद्यार्थ्यांना कांदा, लसूण, बटाटा, बीट यांचा समावेश असलेले पदार्थ टिफिनमध्ये आणण्यास मनाई असल्याच्या सूचना शाळा व्यवस्थापनाने दिल्या होत्या. त्यावरून वादंग निर्माण झाल्यानंतर निर्णय मागे घेण्यात आल्याचे शाळेने म्हटले होते. मात्र, याबाबत आपला लेखी खुलासा दोन दिवसांत संबंधित कार्यालयास सादर करावा. खुलासा समाधानकारक असल्यास अथवा प्राप्त न झाल्यास तुमच्याविरुद्ध माध्यमिक शाळा संहिता, बालकांचा मोफत व सक्तीच्या शिक्षणाचा हक्क अधिनियम २००९ तसेच स्वयं-अर्थसहाय्यित शाळा (स्थापना व नियमन) अधिनियम २०१२ अन्वये प्रशासकीय कार्यवाही करण्यात येईल याची गांभीर्यपूर्वक नोद घ्यावी, असे शिक्षण विभागाच्या परिपत्रकात नमूद करण्यात आले आहे.