राज्यात थंडीनं कहर केला असला तरी, निवडणुकांनी राजकीय माहोल प्रचंड तापलं आहे. बऱ्याच वर्षांनी महापालिकांच्या निवडणुका होत असल्यानं इच्छुक उमेदवारांची संख्या वाढली आहे. तर काही ठिकाणी युती, आघाडी झाल्यानं त्या-त्या राजकीय पक्षांनी संयम ठेवण्याचं आवाहन केलं आहे. पण इतकी वर्षे तयारी करूनही तिकीट कापल्यानं इच्छुकांचा संयम सुटला आहे. छत्रपती संभाजीनगरमध्ये भारतीय जनता पक्षात तर प्रचंड नाराजी आहे. संभाजीनगरमध्ये अतुल सावे यांच्या कार्यालयाबाहेर इच्छुकांनी तिकीट कापल्यानं संताप व्यक्त केला.

काही कार्यकर्त्यांनी तर आपल्या नेत्याला तिकीट नाकारल्यानं सावेंच्या केबिनचा दरवाजा तोडण्याचा प्रयत्न केला. एका इच्छुक महिला उमेदवाराला तर संताप व्यक्त करताना भोवळ आली होती. शेवटी शेवटी तिला बोलताही येत नव्हतं. आम्ही निवडणुकीची तयारी केली होती. लाखो रुपये खर्च केले होते. आता यांनी तिकीट कापून आमचं आयुष्य बर्बाद केलं, असा गंभीर आरोप केला. आणखी एका इच्छुक महिला उमेदवारानं तर सोबत पेट्रोलनं भरलेली बाटली आणली होती. तिनं आत्मदहन करण्याचा प्रयत्न केला. वेळीच पोलिसांनी हस्तक्षेप केल्यानं मोठा अनर्थ टळला. एकूणच छत्रपती संभाजीनगरात भाजपमध्ये प्रचंड नाराजी असल्याचे दिसून आले आहे.