योगेश काशिद, साम टीव्ही

बीड जिल्ह्यात मागील काही काळात मराठा आणि ओबीसी आंदोलनामुळे समाजात तणाव निर्माण झाला होता. निवडणुकीदरम्यानही या दोन्ही गटांमध्ये संघर्ष दिसून आला. या पार्श्वभूमीवर, पोलीस प्रशासनावर पक्षपातीपणाचे आरोप होत होते. अशा परिस्थितीत पोलिसांची भूमिका निष्पक्ष राहावी आणि नागरिकांचा त्यांच्यावरील विश्वास दृढ व्हावा, यासाठी हा निर्णय घेण्यात आला आहे. पोलिस कर्मचारी आणि अधिकाऱ्यांच्या नावासमोर आडनावाचा वापर केला जाणार नाही. सर्वांना केवळ त्यांच्या पहिल्या नावानेच संबोधित केले जाईल.

या निर्णयानुसार, पोलीस कर्मचाऱ्यांच्या नेमप्लेट्स, ओळखपत्रे आणि इतर ठिकाणीही फक्त पहिले नाव दिसेल, आडनाव दर्शवले जाणार नाही.

पोलीस अधीक्षक नवनीत कावंत यांनी दिलेल्या आदेशानुसार, आता कोणत्याही पोलीस कर्मचाऱ्याला त्याच्या आडनावाने हाक मारली जाणार नाही. फक्त पहिल्या नावानेच संबोधन केले जाईल. या निर्णयामुळे समाजातील विविध गटांमध्ये एकात्मता वाढण्यास मदत होईल, अशी अपेक्षा व्यक्त केली जात आहे.