नांदेड : नांदेडमध्ये होत असलेल्या भाजपच्या चिंतन बैठकीला चक्क अशोक चव्हाण यांनीच दांडी मारल्याचं पाहायला मिळालंय. त्यामुळे राजकीय वर्तुळात तर्क वितर्कांना उधाण आलंय. नांदेडमध्ये भाजपच्या चिंतन बैठकीचं आयोजन करण्यात आलं होतं. या बैठकीला रावसाहेब दानवे यांच्या उपस्थितीत महत्त्वाची चर्चा होण्याची शक्यता वर्तवली जात होती. लोकसभा निवडणुकीत झालेल्या पराभवाची कारणे शोधण्यासाठी ही बैठक घेण्यात येत असल्याचं सांगितलं जातं होतं. अशातच या बैठकीला नांदेडमधील ज्येष्ठ नेते म्हणून ओळख असलेले आणि लोकसभा निवडणुकीआधी नुकताच ज्यांनी भाजपमध्ये प्रवेश केला होता, ते अशोक चव्हाणच गैरहजर असल्यानं चर्चांना उधाण आलंय. अशोक चव्हाण हे शुक्रवारी रात्री मुंबईत गेल्याची माहिती मिळतेय.