पुणे: आषाढी एकादशीच्या निमित्ताने पुण्यातील प्रतिपंढरपूर समजल्या जाणाऱ्या विठ्ठलवाडीतील श्री विठ्ठल-रुक्मिणी मंदिरात आज भाविकांनी दर्शनासाठी मोठी गर्दी केली आहे. पहाटेपासूनच मंदिर परिसरात "विठ्ठल विठ्ठल जय हरी विठ्ठल" असा जयघोष सुरु असून, श्रद्धेचा महापूर उसळलेला पाहायला मिळत आहे. मंदिरात पहाटेपासून हजारो भाविकांनी दर्शन घेतले. मंदिरापर्यंत सुमारे १ किलोमीटरची दर्शन रांग लागली असून, संपूर्ण परिसर भक्तिरसात न्हालेला आहे.

मंदिराला आकर्षक फुलांनी आणि रोषणाईने सजवण्यात आले असून, आषाढी निमित्त विविध धार्मिक कार्यक्रमांचेही आयोजन करण्यात आले आहे. भाविकांची वाढती संख्या लक्षात घेता पोलिस प्रशासनाकडून परिसरात कडेकोट बंदोबस्त ठेवण्यात आला आहे. वाहतूक व्यवस्था सुरळीत ठेवण्यासाठी वाहतूक पोलीसही तैनात करण्यात आले आहेत.