अजित पवार यांच्या विमानाचा अपघात नसून तो घातपात असल्याचा संशय व्यक्त केला जात आहे. यावर राष्ट्रवादी काँग्रेस शरद पवार गटाचे खासदार अमोल कोल्हे यांनी प्रतिक्रिया दिली. साम टीव्हीला दिलेल्या 'ब्लॅक अँड व्हाईट' मुलाखतीमध्ये त्यांनी थेट या अपघाताबाबत अनेक प्रश्न उपस्थित केले. ते म्हणाले की, 'रोहित पवारांनी जे काही प्रश्न उपस्थित केले ते खरंच फार महत्वाचे आहेत. महाराष्ट्रच्या मनात प्रश्नचिन्ह आहे. महाराष्ट्रभरातून प्रतिक्रिया उमटत आहेत. सोशल मीडियावर, लोकांशी बोलल्यानंतर अनेक प्रश्न निर्माण होतात. मी स्वत: मुंबईत राहतो. मलाच प्रश्न पडला की सकाळी साडेसहा वाजता कुठे ट्रॅफिक असते. सकाळी साडेसहाला ट्रॅफिक असल्यामुळे पायलट बदलला तर त्या पायलटचा सीडीआर निघाला असता. बारामतीला मी अनेक वेळेला गेलो आहे. तिथे दोन एअरस्ट्रीप आहेत. ११० आणि २९० या दोन एअरस्ट्रीप आहेत. ११० ला व्हिजिबिलिटीचा प्रॉब्लेम होता तर मग २९० ला उतरवण्याचा प्रयत्न का नाही झाला असे अनेक प्रश्न आहेत. ब्लॅक बॉक्सबद्दल काही एक्सपर्ट असे सांगतात की ब्लॅक बॉक्स विमानाच्या शेपटीकडे असतो. अहमदाबादच्या विमानात लंडनला जाईपर्यंत लागेत इतके इंधन होते.म्हणजे तो ब्लास्ट जास्त मोठा होता. तो ब्लास्ट मोठा असताना त्यामधील ब्लॅक बॉक्स सुरक्षित राहतो पण बारामतीत जी दुर्घटना घडली त्यामध्ये काय झाले. जोपर्यंत या प्रश्नांची स्वच्छ उत्तरं मिळत नाहीत आणि दूध का दूध पाणी का पाणी होत नाही तोपर्यंत महाष्ट्राच्या मनात हे प्रश्न येत राहणार. कारण महाराष्ट्राने एक फार मोठा नेता गमावला आहे.'