बॉलिवूडचे महानायक अमिताभ बच्चन आता ८४ वर्षांचे असले, तरीही त्यांची क्रेझ तसूभरही कमी झालेली नाही. या वयातही ते सिनेसृष्टीत सक्रिय असून दर रविवारी न चुकता आपल्या चाहत्यांना भेटण्यासाठी त्यांच्या जुहूमधील त्यांच्या जलसा या बंगल्याबाहेर येतात. मात्र, यंदाचा रविवार हा नेहमीपेक्षा वेगळा ठरला.काही दिवसांपूर्वीच अमिताभ बच्चन यांच्या निवासस्थानावर आणि गायक दिलजीत दोसांझच्या म्युझिक कॉन्सर्टवर आत्मघाती हल्ला करण्याची धमकी मिळाल्याने मुंबई पोलीस आणि सुरक्षा यंत्रणा सतर्क झाल्या होत्या. जीवघेणा धोका असतानाही, बिग बी आज नित्य नियमाने चाहत्यांना भेटण्यासाठी बंगल्याबाहेर आले. अमिताभ बच्चन ज्या खास ट्रॉलीवर उभे राहून बंगल्याच्या गेटवरून चाहत्यांना हात उंचावून अभिवादन करतात, त्या ट्रॉलीला यावेळी चारही बाजूंनी उच्च दर्जाच्या बुलेटप्रूफ काचेने कव्हर करण्यात आले होते.