अनेक वर्षाच्या प्रतिक्षेनंतर ठाकरे बंधु हे आज एकत्र आले. या सभेला मोठा जनसागर उसळला होता. उद्धव ठाकरे आणि राज ठाकरे एकत्र आल्याने शिवसेना ठाकरे गट आणि मनसेच्या कार्यकर्त्यामध्ये प्रचंड उत्साह होता. या पार्श्वभूमीवर राज ठाकरे आणि उद्धव ठाकरे यांनी विजयी सभेतून भाजपवर जोरदार हल्लाबोल चढवला. सुप्रिया सुळे या देखील मंचावर उपस्थित होत्या.

भाषण संपल्यानंतर त्या ठिकाणी उपस्थित असलेल्या सर्वपक्षीय नेत्यांना मंचावर बोलवण्यात आले. यावेळी सर्वांसोबत अमित ठाकरे आणि आदित्य ठाकरे यांना बोलवले असता सुप्रिया सुळे यांनी पुढाकार घेत अमित ठाकरे यांना उद्धव ठाकरे यांच्या बाजूला आणि आदित्य ठाकरे यांना राज ठाकरेंच्या बाजूला उभे केले. याच दरम्यान आदित्य ठाकरे आणि अमित ठाकरेंनी हातात हात धरून मंचावर आले आणि गळाभेट केली. यानंतर संपूर्ण वरळी डोममध्ये आनंदाचे वातावरण पाहायला मिळाले.