दिवेआगर येथील समुद्रात बुडून आळंदीतील ८ विद्यार्थ्यांचा दुर्दैवी मृत्यू झाल्याच्या घटनेनं संपूर्ण आळंदी शहरावर शोककळा पसरली आहे. या विद्यार्थ्यांना श्रद्धांजली अर्पण करण्यासाठी २ ऑक्टोबर रोजी अत्यावश्यक सेवा वगळता आळंदी बंद ठेवण्याचं आवाहन करण्यात आलं आहे. आळंदीतील विद्यार्थ्यांच्या दिवेआगर सहलीदरम्यान समुद्रात बुडून बारावीच्या ८ विद्यार्थ्यांचा मृत्यू झाला. या दुर्दैवी घटनेनं विद्यार्थी, पालक आणि नागरिकांमध्ये हळहळ व्यक्त होत आहे. या पार्श्वभूमीवर नगराध्यक्ष प्रशांत कुन्हाडे यांनी आळंदी बंदचं आवाहन केलं आहे. २ ऑक्टोबर रोजी अत्यावश्यक सेवा वगळता सर्व व्यापारी, व्यावसायिक, संस्था आणि नागरिकांनी स्वयंस्फूर्तीने बंदमध्ये सहभागी व्हावं, असं आवाहन करण्यात आलं. तसेच शोकाकुल कुटुंबांच्या दुःखात सहभागी होत दिवंगत विद्यार्थ्यांना भावपूर्ण श्रद्धांजली अर्पण करण्यात येणार आहे.