विधानसभेच्या निवडणुकी दरम्यान उपमुख्यमंत्री अजित पवार यांनी शेतकऱ्यांची कर्जमाफी करू असे आश्वासन दिले होते. तसेच लाडक्या बहीणींना 2100 रुपये दिले जातील असे ही अजित पवार यांनी ठणकावून सांगितले होते. मात्र यंदाच्या अर्थसंकल्पीय अधिवेशनात सरकारला या सगळ्या आश्वासनांचा विसर पडला. अजित पवार यांनी काही दिवसपूर्वी आपल्या भाषणात शेतकऱ्यांनी 31 मार्च पर्यंत आपल्या कर्जाची रक्कम भरा असे सांगितल्यानंतर शेतकरी हे सरकारवर तीव्र आक्रमक झाले आहे.

या मुद्द्यावर ठाकरे गटाचे खासदार संजय राऊत यांनी अजित पवारांवर तोफ डागली आहे. संजय राऊत म्हणाले, अर्थमंत्री अजित पवार यांची विधानसभा निवडणुकीपूर्वीची भाषा तसेच देवेंद्र फडणवीस आणि एकनाथ शिंदे यांची भाषा पूर्णपणे वेगळी होती. लाडक्या बहिणींना 2100 रुपये देण्यापासून ते कर्जमाफीपर्यंत करणारच असे जोर देऊन देऊन सांगत होते. आता अजित पवार यांनी हात वर केले आहेत. अजित पवार यांनी राजीनामा द्यायला पाहिजे. जर ते कर्जमाफी करू शकत नसेल आणि लाडक्या बहिणींना 2100 देणार नसेल. तर त्यांनी महाराष्ट्राच्या जनतेचा वचनभंग केल्याबद्दल त्यांचा राजीनामा जनतेने मागण्यापेक्षा त्यांनी स्वतःहून नैतिकतेच्या मुद्द्यावर राजीनामा दिला पाहिजे.अशी संजय राऊत यांनी मागणी केली.