राष्ट्रवादी काँग्रेस (शरदचंद्र पवार) पक्षाचे अध्यक्ष शरद पवार यांचा आज वाढदिवस आहे. याचं औचित्य साधून उपमुख्यमंत्री अजित पवार यांनी देखील आज दिल्लीत काका शरद पवार यांची भेट घेतली. दिल्लीमध्ये अचानक त्यांच्या घरी भेट देऊन त्यांना शुभेच्छा दिल्या. या भेटीदरम्यान अजित पवार यांच्यासोबत पत्नी सुनेत्रा पवार, मुलगा पार्थ पवार, प्रफुल्ल पटेल, छगन भुजबळ, सुनील तटकरे आदी नेते उपस्थित होते.

या भेटीत शरद पवार आणि अजित पवार यांच्यामध्ये जवळपास अर्धा तास चर्चा झाली. या भेतीबद्दल आता अजित पवार यांनी खुलासा केला आहे. शरद पवार यांच्या भेटीनंतर त्यांनी माध्यमांना प्रतिक्रिया देताना म्हटलं की, ही अनौपचारिक भेट होती. या भेटीदरम्यान कोणत्याही राजकीय चर्चा झाल्या नाही. आज त्यांचा वाढदिवस असतो. त्यामुळे त्यांना प्रत्यक्ष भेटून आम्ही शुभेच्छा दिल्या आहेत, असं अजित पवार यांनी म्हंटलं.