महिला दिनाच्या निमित्ताने राज्य सरकारतर्फे जाहीर करण्यात आलेल्या तीन हजार रुपयांच्या आर्थिक मदतीबाबत गोंधळ निर्माण झाला आहे. अनेक महिलांच्या खात्यात केवळ 1500 रुपयेच जमा झाल्याने विरोधकांनी सरकारवर टीका केली आहे. राज्याच्या महिला व बालविकास मंत्री आदिती तटकरे यांनी जागतिक महिला दिनाच्या दिवशी पात्र महिलांच्या खात्यात 3000 रुपये जमा करण्यात येतील, असे आश्वासन दिले होते. मात्र, प्रत्यक्षात काही महिलांच्या खात्यात फक्त 1500 रुपयेच जमा झाल्याची माहिती समोर आली. त्यामुळे सरकारवर टीकेची झोड उठवण्यात आली. यावर स्पष्टीकरण देताना मंत्री अदिती तटकरे यांनी ट्विटद्वारे माहिती दिली की, फेब्रुवारी आणि मार्च महिन्याचे मिळून एकूण 3000 रुपये सर्व पात्र महिलांच्या खात्यात 12 मार्च रोजी जमा करण्यात येणार आहेत.