मुंबईतील वाढत्या प्रदूषणाच्या पार्श्वभूमीवर यंदाची दिवाळी फटाक्यांशिवाय साजरी करण्याचे आवाहन मुंबई महानगरपालिकेकडून करण्यात आले आहे. यासाठी महापालिकेने विशेष जनजागृती मोहीम सुरू केली आहे. या मोहिमेत काही प्रसिद्ध कलाकारांचाही सहभाग घेण्यात आला आहे. मात्र, या मोहिमेमुळे आता नवा राजकीय वाद निर्माण झाला आहे. मुंबईतील हवेचे प्रदूषण आणि ध्वनी प्रदूषण कमी करण्यासाठी नागरिकांनी दिवाळीत फटाके फोडणे टाळावे, असा संदेश या मोहिमेतून दिला जात आहे. यासाठी अभिनेत्री दीया मिर्झा हिचा व्हिडिओही महापालिकेने सोशल मीडियावर प्रसिद्ध केला होता. मात्र, या व्हिडिओवर मुंबई भाजपचे अध्यक्ष अमित साटम यांनी आक्षेप घेतला.

अमित साटम यांनी सोशल मीडियावर पोस्ट करत महापालिकेच्या या निर्णयावर नाराजी व्यक्त केली. दिवाळी कशी साजरी करावी, हे सांगण्यासाठी दीया मिर्झासारख्या अभिनेत्रीची गरज नाही, असे त्यांनी म्हटले. भारतीय सण आणि परंपरा या आपल्या संस्कृतीचा महत्त्वाचा भाग आहेत. त्यामुळे दिवाळी साजरी करण्याबाबत बाहेरच्या व्यक्तीकडून शिकण्याची आवश्यकता नसल्याचे मतही त्यांनी व्यक्त केले.भाजपकडून आक्षेप घेतल्यानंतर मुंबई महानगरपालिकेने दीया मिर्झाचा व्हिडिओ आपल्या हटवला. विशेष म्हणजे, हा व्हिडिओ का हटवण्यात आला, याबाबत महापालिकेकडून कोणतेही अधिकृत स्पष्टीकरण देण्यात आलेले नाही.