आयपीएल २०२४ स्पर्धेतील ६८ वा सामना अतिशय महत्वाचा असणार आहे. कारण या सामन्यात रॉयल चॅलेंजर्स बंगळुरूचा संघ चेन्नई सुपर किंग्ज संघाचा सामना करताना दिसून येणार आहे. हा सामना प्लेऑफमध्ये जाण्याच्या दृष्टीने दोन्ही संघांसाठी अतिशय महत्वाचा असणार आहे. या सामन्यापूर्वी दोन्ही संघांचं टेन्शन वाढवणारी बातमी समोर आली आहे. या सामन्यात पाऊस पडणार असल्याचा अंदाज व्यक्त करण्यात आला आहे. दरम्यान हा सामना रद्द झाल्यास प्लेऑफचं तिकीट कोणाला मिळणार? कसं असेल समीकरण? जाणून घ्या.

हवामान खात्याने १८-२० मे दरम्यान बंगळुरूत ऑरेंज अलर्ट जाहीर केला आहे. यानुसार अतीमुसळधार पाऊस पडण्याचा अंदाज वर्तवण्यात आला आहे. AccuWeather ने दिलेल्या अंदाजानुसार, १८ मे रोजी बंगळुरूत पाऊस पडण्याची शक्यता ही ७० ते ८० टक्के इतकी असणार आहे.

सामना रद्द झाल्यास कोणाला मिळणार प्लेऑफचं तिकीट?

हा सामना रद्द झाला, तर दोन्ही संघांना प्रत्येकी १-१ गुण दिला जाईल. त्यामुळे रॉयल चॅलेंजर्स बंगळुरूचास संघ प्लेऑफच्या शर्यतीतून बाहेर पडेल. तर चेन्नई सुपर किंग्जचा संघ प्लेऑफसाठी पात्र ठरेल. चेन्नई सुपर किंग्जचा संघ सध्या १४ गुणांसह चौथ्या स्थानी आहे. तर रॉयल चॅलेंजर्स बंगळुरूचा संघ १२ गुणांसह सहाव्या स्थानी आहे. सामना रद्द झाल्यास दोन्ही संघांना प्रत्येकी १-१ गुण दिला जाईल. असे झाल्यास चेन्नई सुपर किंग्जचे १५ गुण होतील. तर रॉयल चॅलेंजर्स बंगळुरूचा संघ १३ गुणांपर्यंत पोहचेल. हे गुण प्लेऑफमध्ये स्थान मिळवण्यासाठी पुरेसे नसतील.

आयपीएल २०२४ स्पर्धेतील प्लेऑफच्या सामन्यांना २१ मे पासून सुरुवात होणार आहे. क्वालिफायर १ चा सामना २१ मे रोजी अहमदाबादच्या नरेंद्र मोदी स्टेडियमवर रंगणार आहे. तर २२ मे रोजी एलिमिनेटर आणि २४ मे रोजी एलिमिनेटर २ चा सामना रंगणार आहे. तर स्पर्धेतील फायनलचा सामना २६ मे रोजी चेन्नईमध्ये रंगणार आहे.