टीम इंडियाचा माजी क्रिकेटपटू वीरेंद्र सेहवाग मागील काही दिवसांपासून खूप चर्चेत आहे. सेहवाग आणि त्याची पत्नी आरती अहलावत हे लग्नाच्या २० वर्षांनंतर वेगळे होणार असल्याचा दावा काही रिपोर्टमध्ये करण्यात आला आहे. काहींनी त्यांच्या घटस्फोटाची प्रक्रिया पूर्ण झाल्याचेही म्हटले आहे. अशातच सेहवागच्या एका व्हिडीओमुळे खळबळ उडाली आहे. या व्हिडीओमध्ये तो सर्वांना लग्नाचे आमंत्रण देत आहे.

वीरेंद्र सेहवाग सोशल मीडियावर फार सक्रीय आहे. त्याचे अनेक ट्वीट्स, फोटो, व्हिडीओ व्हायरल होत असतात. त्याने नुकताच इन्स्टाग्रामवर एक व्हिडीओ पोस्ट केला आहे. या व्हिडीओमध्ये तो सर्वांना लग्नसोहळ्याला हजेरी लावण्यासाठी बोलावत आहे. या व्हिडीओची सोशल मीडियावर चर्चा होत आहे.

काय म्हणाला वीरेंद्र सेहवाग?

भारतभूमीमध्ये बागेश्वर धाम हे पवित्र स्थान आहे. फेब्रुवारी २०२५ मध्ये निराधार असणाऱ्या युवतींचा कन्या विवाह महोत्सव बुंदेलखंड येथे आयोजित करण्यात आला आहे. या विवाह महोत्सवामध्ये आदिवासी समाजातील १५१ मुलींचे आणि अन्य सर्व समाजातील १४० मुलींचा विवाहसोहळा संपन्न होणार आहे. २२ ते २६ फेब्रुवारी या दरम्यान विवाहसोहळा असणार आहे.

बागेश्वर धामच्या वतीने बुंदेलखंड येथे निराधार मुलींचा विवाह महोत्सव पार पाडला जाणार आहे. ज्यांना कोणाचाही आधार नाही, अशा असंख्य मुलींचा विवाह या महोत्सवामध्ये होणार आहे. विशेष म्हणजे मंदिराच्या दानपेटीतील पैशांचा सदुपयोग करुन हा भव्यदिव्य विवाहसोहळा संपन्न होणार आहे. या लग्नसोहळ्याला उपस्थित राहण्याचे आमंत्रण वीरेंद्र सेहवागने दिले आहे.