Kane Williamson News Update: न्यूझीलंडच्या केन विलियमसन यानं कसोटी संघाचं कर्णधारपद सोडण्याची घोषणा केली. न्यूझीलंड क्रिकेटनं यासंबंधीचं निवेदन प्रसिद्ध करून ही माहिती दिली. विलियमसन हा वनडे आणि टी २० क्रिकेट संघाचे नेतृत्व करणार आहे. आंतरराष्ट्रीय स्तरावरील तिन्ही प्रकारांत खेळण्याची इच्छा त्यानं व्यक्त केली आहे.

केन विलियमसन यानं कसोटी संघाचं कर्णधारपद सोडल्यानंतर त्यामागचं कारण काय, अशी चर्चा सुरू झाली. त्याचवेळी याबाबत स्वतः विलियमसननं कारण स्पष्ट केलंय. कसोटी क्रिकेटमध्ये न्यूझीलंड संघाचं कर्णधारपद भूषवणं हा विशेष सन्मान आहे. माझ्यासाठी तरी कसोटी हे क्रिकेटचं सर्वोत्तम शिखर आहे. कसोटी क्रिकेटमध्ये संघाचं नेतृत्व करताना असलेल्या आव्हानांचा आनंद लुटला आहे. कर्णधारपदावर असताना मैदान आणि मैदानाबाहेरही कामाचा ताण वाढतोय. करिअरच्या या टप्प्यावर हा निर्णय योग्य आहे, असं मला वाटतंय, असं विलियमसन म्हणाला. (Latest Marathi News)

विलियमसन म्हणाला की, न्यूझीलंड क्रिकेट बोर्डासोबत सल्ला-मसलत केल्यानंतरच पुढील दोन वर्षांत दोन विश्वचषक स्पर्धा होत आहेत. त्यामुळे मर्यादित षटकांच्या क्रिकेटमध्ये कर्णधारपदी राहणं उचित होईल, असं मला वाटलं. (Sports News)

अनुभवी साउदीकडे जबाबदारी

विलियमसननं कर्णधारपद सोडल्यानंतर अनुभवी खेळाडू टीम साउदी याच्याकडे कसोटी क्रिकेट संघाचं नेतृत्व सोपवलं आहे. तर टॉम लॅथम याच्याकडे उपकर्णधारपद सोपवलं आहे. साउदी याच महिन्यात पाकिस्तानविरुद्ध होणाऱ्या कसोटी मालिकेद्वारे कर्णधारपद सांभाळणार आहे. साउदीनं ३४६ आंतरराष्ट्रीय सामन्यांत प्रतिनिधीत्व केले आहे. तर २२ टी २० सामन्यांत संघाचं नेतृत्व केलं आहे. साउदी हा न्यूझीलंडचा ३१ वा कसोटी कर्णधार असणार आहे.