Tata IPL 2025 Schedule News : आयपीएल म्हणजेच इंडियन प्रीमियर लीगच्या १८ व्या हंगामाचे वेळापत्रक बीसीसीआयने जाहीर केले आहे. यंदाच्या हंगामाला २२ मार्च २०२५ ला सुरुवात होणार आहे. गतविजेते कोलकाता नाइट रायडर्स आणि रॉयल चॅलेंजर्स बंगळुरू या पहिल्या सामन्यात समोरासमोर येणार आहेत. हा सामना ईडन गार्डन्सवर खेळवला जाणार आहे.

आयपीएलमध्ये एकूण ७४ सामने खेळवले जाणार आहेत. २० मे रोजी क्वालिफायर 1 आणि २१ मे रोजी एलिमिनेटर असे सामने होतील. २३ मे रोजी क्वालिफायर 2 चा सामना खेळला जाईल. आयपीएलच्या अठराव्या हंगामाचा अंतिम सामना २५ मे रोजी ईडन गार्डन्स क्रिकेट स्टेडियमवर खेळवला जाणार असल्याची माहिती बीसीसीआयने दिली आहे.

स्पर्धेमध्ये २३ मार्चला एमए चिंदबरम स्टेडियमवर मुंबई इंडियन्स विरुद्ध चेन्नई सुपर किंग्स असा मानाचा सामना होणार आहे. त्याच दिवशी हैदराबाद आणि राजस्थानमध्येही सामना रंगणार आहे. २३ मार्चला यंदाच्या हंगामातील पहिला डबल हेडर होईल. आयपीएलच्या एकूण वेळापत्रकानुसार, स्पर्धेच्या ७४ सामन्यांच्या कालावधीत १२ वेळा डबल हेडर सामने होतील.

९ मार्च रोजी चॅम्पियन्स ट्रॉफीचा अंतिम सामना संपणार आहे. लगेचच १२ दिवसांनी आयपीएलचा सुरुवात होणार आहे. चॅम्पियन्स ट्रॉफीनंतर लगेचच आयपीएल सुरु होत असल्याने क्रिकेट चाहत्यांमध्ये उत्साहाचे वातावरण निर्माण झाले आहे. क्रिकेटप्रेमींसाठी हा काळ पर्वणी ठरणार असल्याचे म्हटले जात आहे.