भारत आणि श्रीलंका या दोन्ही संघांमध्ये ३ टी-२० सामन्यांची मालिका सुरु आहे. ही मालिका झाल्यानंतर दोन्ही संघ ३ वनडे सामन्यांची मालिका खेळण्यासाठी आमनेसामने येणार आहेत. या मालिकेला २ ऑगस्टपासून सुरुवात होणार आहे. भारतीय संघाने वनडे आणि टी-२० मालिकेसाठी एकत्र संघ घोषित केला होता. तर श्रीलंकेने तिसऱ्या टी-२० सामन्यापूर्वी वनडे मालिकेसाठी संघाची घोषणा केली आहे. या मालिकेसाठी चरिथ असलंकाकडे कर्णधारपदाची जबाबदारी सोपवण्यात आली आहे. तर दसून शनाका आणि अँजेलो मॅथ्यूजला या मालिकेसाठी संघात स्थान देण्यात आलेलं नाही.

केव्हा होणार सुरुवात?

भारत आणि श्रीलंका या दोन्ही संघांमध्ये वनडे सामन्यांची मालिका रंगणार आहे. या मालिकेला २ ऑगस्टपासून सुरुवात होणार आहे. मालिकेतील दुसरा सामना ४ ऑगस्ट आणि तिसरा सामना ७ ऑगस्ट रोजी खेळवला जाईल. या मालिकेत रोहित शर्मा भारतीय संघाचं नेतृत्व करताना दिसून येणार आहे. तर विराट कोहली आणि कुलदीप यादव देखील या मालिकेतून कमबॅक करताना दिसून येणार आहे.

या मालिकेसाठी असा आहे श्रीलंकेचा संघ:

चरिथ असलंका (कर्णधार), पथुम निसंका, अविष्का फर्नांडो, कुसल मेंडिस, सदीरा समरविक्रमा, कामिंदु मेंडिस, जेनिथ लियानगे, चमिका करुणारत्ने, महीश थीक्षाना, अकिला धनंजय, दिलशान मदुशंका, मथीशा पथिराना,असिथा फर्नांडो, निशान मदुश्का, वानिंदु हसरंगा, डुनिथ वेललागे.

टी -२० मालिकेत भारतीय संघाचा विजय

या मालिकेसाठी सूर्यकुमार यादवची भारतीय संघाचा कर्णधार म्हणून घोषणा करण्यात आली होती. सूर्याच्या नेतृत्वाखाली खेळताना भारतीय संघाने दमदार कामगिरी करुन दाखवली आहे. पहिल्या टी-२० सामन्यात भारतीय संघाने ४३ धावांनी विजय मिळवला होता. तर मालिकेतील दुसऱ्या सामन्यात भारतीय संघाने ७ गडी राखून विजय मिळवला होता.