फुटबॉलच्या मैदानावर प्रत्येक खेळाडूची काही ना काही खास सवय असते. कोणी मैदानात उजवा पाय आधी टाकतो तर कुणी खास प्रार्थना करून खेळायला उतरतो. पण ब्राझीलचा स्टार गोलकीपर आणि मॅन्चेस्टर सिटीचा खेळाडू एडरसन याचा टोटका ऐकून अनेकजण चक्रावलेत. कारण गेल्या तब्बल ८ वर्षांपासून तो प्रत्येक सामना एकाच अंडरवेअरमध्ये खेळत असल्याचं त्याने स्वतः सांगितलं आहे.

मुलाखतीत केला खुलासा

२०१७ मध्ये मॅन्चेस्टर सिटी टीममध्ये सामील झालेल्या एडरसनने गेल्या वर्षी दिलेल्या एका मुलाखतीत याबाबत सांगितलं होतं. त्याने सांगितलं की, त्याचा फक्त एकच टोटका आहे आणि तो म्हणजे प्रत्येक सामना एकाच अंडरवेअरमध्ये खेळणं. विशेष म्हणजे, या काळात एडरसनने मॅन्चेस्टर सिटीसाठी अनेक मोठ्या लीग्समध्ये विजय मिळवत ट्रॉफी जिंकल्या आहेत.

BBC च्या ‘मॅच ऑफ द डे’ कार्यक्रमात बोलताना एडरसनने त्याच्या या विचित्र सवयीबद्दल सांगितलं. त्यानंतर मुलाखत घेणाऱ्यानेही उत्सुकतेपोटी त्याला विचारलं की, इतकी वर्षे वापरल्यामुळे त्या अंडरवेअरचा आकार बदलला नसेल का? यावर एडरसनने हसत 'नाही' असं उत्तर दिलं.

कशी आहे एडरसनची कारकिर्द?

एडरसनच्या आंतरराष्ट्रीय कारकिर्दीकडे पाहिल्यास त्याने २०१८ मध्ये चिलीविरुद्ध ब्राझीलकडून डेब्यू केला होता. त्या सामन्यात ब्राझीलने ३-० असा विजय मिळवला होता. त्याची निवड २०२२ मध्ये कतारमध्ये झालेल्या फिफा वर्ल्डकपसाठीही करण्यात आली होती. त्या स्पर्धेत क्वार्टर फायनलपर्यंत पोहोचलेल्या ब्राझील टीमसाठी त्याने फक्त एक सामना खेळला होता.

ब्राझीलसाठी एडरसनने आतापर्यंत ३१ सामने खेळलेत. तर मॅन्चेस्टर सिटीकडून तो तब्बल २७६ सामन्यांमध्ये मैदानात उतरला आहे. मैदानावरील त्याच्या कामगिरी इतकाच त्याचा हा हटके टोटकाही आता चाहत्यांमध्ये चर्चेचा विषय ठरतोय.