Sara Tendulkar News Update : भारताचा महान फलंदाज सचिन तेंडुलकर हा जगातील सर्वात श्रीमंत क्रिकेटपटूंपैकी एक आहे. सचिनला त्याचे चाहते क्रिकेटचा देव म्हणतात. सचिनच्या कुटुंबाचे देखील क्रिकेटशी खास नाते आहे. त्याचा मोठा भाऊ देखील क्रिकेट खेळायचा. सचिनचा मुलगा अर्जुन वेगवान गोलंदाज आहे. अशातच सचिनच्या लेकीने, सारा तेंडुलकरने क्रिकेटच्या विश्वामध्ये पाऊल ठेवले आहे. तिने एक क्रिकेट टीम खरेदी केली आहे.

सारा तेंडुलकर सोशल मीडियावर खूप जास्त सक्रीय आहे. तिने नुकतीच एक पोस्ट शेअर केली. या पोस्टमध्ये साराने मुंबईशी संबंधित एक क्रिकेटचा संघ विकत घेतल्याचे म्हटले होते. सारा तेंडुलकरने ग्लोबल ई-क्रिकेट प्रीमियर लीगमध्ये मुंबईची फ्रँचायझी खरेदी केली आहे. हा संघ विकत घेण्यामागील कारण देखील साराने सांगितले आहे.

'किक्रेट हा खेळ माझ्या आणि माझ्या कुटुंबासाठी अविभाज्य घटक आहे. ई-स्पोर्ट्समध्ये क्रिकेटची क्षमता उत्साहित करणारी आहे. मुंबई फ्रँचायझीची मालकी हे माझे एक स्वप्न सत्यात उतरले आहे. यामुळे क्रिकेट आणि मुंबई या दोन्ही गोष्टींवरील प्रेम एक झाले आहे. या प्रतिभावान संघात सामील होण्यासाठी मी खूप उत्सुक आहे. लोकांचे मनोरंजन होईल अशी फ्रँचायझी आम्ही तयार करु', असे वक्तव्य सारा तेंडुलकरने केले आहे. काही दिवसांपूर्वी साराची सचिन तेंडुलकर फाउंडेशन म्हणजेच एसटीएफच्या संचालकपदी नियुक्ती करण्यात आली आहे.

'मुंबई फ्रँचायझीची मालकीण म्हणून सारा तेंडुलकरचे लीगमध्ये सामील होणे हा जीईपीएलसाठी महत्त्वपूर्ण क्षण आहे. त्यांची उपस्थिती आणि चाहत्यांशी असलेले घनिष्ठ संबंध यांमुळे लीगचा दर्जा नक्कीच वाढेल', असे वक्तव्य जीईपीएलचे सीईओ आणि लीग कमिश्नर रोहित पोटफोडे यांनी केले आहे.