२०२६ च्या टी-२० वर्ल्डकपची दुसरी सेमीफायनल उद्या म्हणजेच ५ मार्च रोजी मुंबईतील वानखेडे स्टेडियमवर होणार आहे. या सामन्यात भारत विरूद्ध इंग्लंड एकमेंकांच्या समोर येणार आहेत. दरम्यान या सामन्यापूर्वी इंग्लंडचा स्टार ऑलराऊंडर सॅम करनने भारतीय चाहत्यांना उद्देशून एक मोठं विधान केलं आहे.

वानखेडे स्टेडियम म्हटलं की, आपल्या डोळ्यासमोर उभा राहतो तो उत्साही आणि आनंदाने गोंगाट करणाचा चाहता वर्ग. सेमीफायनलमध्ये भारतीय फॅन्स टीम इंडियासाठी चीअर अप करतील यामध्ये काहीच वाद नाही. उद्याच्या सेमीफायनलमध्येही चाहत्यांचा जल्लोष पाहायला मिळणार आहेत. दरम्यान भारताचा पराभव करत फॅन्सना शांत करण्यावर सॅमने भाष्य केलंय.

सामन्यापूर्वीच्या पत्रकार परिषदेत बोलताना सॅम करन म्हणाला, 'हे एक भव्य आणि आयकॉनिक स्टेडियम आहे. मला खात्री आहे की, गुरुवारी रात्री या स्टेडियमवर भयाण शांतता पसरेल. एक तरुण क्रिकेटपटू म्हणून तुम्ही भारताविरुद्ध वर्ल्डकपची सेमीफायनल खेळण्याचं स्वप्न पाहता. या मैदानावरील पीच सहसा फलंदाजीसाठी चांगली असतं आणि मैदान लहान असतं, म्हणून मला हाय-स्कोअरिंग सामना अपेक्षित आहे.'

पॅट कमिन्सची आठवण

२०२३ च्या वनडे वर्ल्डकप फायनलपूर्वी पॅट कमिन्सने अहमदाबादमधील नरेंद्र मोदी स्टेडियममध्ये १,००,००० हून अधिक भारतीय फॅन्सना शांत करणार असल्याचं सांगितलं होतं. कमिन्सने फायनलपूर्वी स्टेडियममधील गर्दीला शांत करणार असल्याची इच्छा व्यक्त केली होती. दरम्यान विराट कोहलीची विकेट घेऊन त्याची इच्छा पूर्ण केली होती.

उद्या वानखेडेवर इंग्लंड एका मजबूत टीम इंडियाचा सामना करणार आहे. मात्र करन कोणत्याही प्रेशरखाली नसल्याचं दिसतंय. तो म्हणाला की, इंग्लंडच्या टीमला भारतीय परिस्थितीत खेळण्याची सवय आहे. टीमच्या बहुतेक खेळाडूंनी भारताविरुद्ध आंतरराष्ट्रीय सामने खेळलेत. आणि आयपीएलमध्येही भाग घेतला आहे.

करनने पुढे सांगितलं की, आम्हाला एक परफेक्ट गेम खेळायचा आहे. भारत एक उत्तम टीम आहे. परंतु आम्ही पूर्णपणे तयार आहोत. आम्ही श्रीलंकेमध्ये नंतर कोलकातामध्ये सामने खेळलोय. परंतु सगळीकडेच परिस्थिती वेगळी होती. मात्र आम्ही त्यांच्याशी चांगल्या पद्धतीने जुळवून घेतलंय.