आयपीएल २०२५ स्पर्धा सुरु होण्याआधीच राजस्थान रॉयल्स संघाने सर्वांनाच आश्चर्याचा धक्का दिला होता. संजू सॅमसन संघात असूनसुद्धा ही जबाबदारी युवा अष्टपैलू खेळाडू रियान परागकडे सोपवण्यात आली. रियान सुरुवातीच्या ३ सामन्यांमध्ये राजस्थान रॉयल्स संघाचं नेतृत्व करणार असल्याचं संजूने आधीच सांगितलं होतं.

रियानच्या नेतृत्वात राजस्थानने सुरुवातीचे २ सामने गमावले, तर तिसऱ्या सामन्यात विजयाची नोंद केली. दरम्यान चेन्नई सुपर किंग्ज विरुद्ध झालेल्या सामन्यानंतर रियान परागने असं काही केलं, ज्याचा व्हिडिओ सध्या सोशल मीडियावर तुफान व्हायरल होतोय

फॅन्सचा मोबाईल फेकला

आपल्या आवडत्या खेळाडूला खेळताना पाहण्यासाठी फॅन्स आतुरतेने वाट पाहत असतात. जर आवडत्या खेळाडूसोबत सेल्फी घेण्याची संधी मिळाली, तर ही संधी कोणीच सोडणार नाही. अशीच काहीशी संधी गुवाहाटी स्टेडियमच्या स्टाफमध्ये काम करत असलेल्या सदस्यांना मिळाली.

काही फॅन्सने रियानला सेल्फी काढण्याची विनंती केली. त्याने हसत सेल्फी तर घेतला, मात्र सेल्फी घेतल्यानंतर त्याचा मोबाईल फेकून दिला. हा व्हिडिओ व्हायरल होताच, चाहते चांगलेच संतापले आहेत.

कोलकाता नाईट रायडर्स संघाविरुद्ध झालेल्या सामन्यात एक फॅन सुरक्षा रक्षकांना चकवा देऊन मैदानात आला आणि रियान परागच्या पाया पडला होता. त्यावेळीही रियान परागचा अॅटीट्यूड दिसून आला होता.

त्यानंतरही त्याला ट्रोलिंगचा सामना करावा लागला होता. आता मोबाईल फेकल्यानंतर पुन्हा त्याला ट्रोलिंगचा सामना करावा लागला आहे. इतका अॅटीट्यूड कशासाठी? धोनी, कोहली आणि रोहितनेही इतका अॅटीट्यूड दाखवला नसेल.. अशी जोरदार टीका रियान परागवर केली जाऊ लागली आहे.

राजस्थानचा शानदार विजय

तर या सामन्याबद्दल बोलायचं झालं, तर या सामन्यात चेन्नई सुपर किंग्ज संघाने नाणेफेक जिंकून प्रथम गोलंदाजीचा निर्णय घेतला. प्रथम फलंदाजीसाठी आलेल्या राजस्थान रॉयल्सला २० षटकअखेर १८२ धावा करता आल्या. या धावांचा पाठलाग करताना चेन्नई सुपर किंग्ज संघाला १७६ धावांपर्यंत मजल मारता आली. हा सामना राजस्थानने ६ धावांनी आपल्या नावावर केला.