Pakistan vs England 1st Test, Shan Masood Record: इंग्लंड आणि पाकिस्तान या दोन्ही संघांमध्ये कसोटी मालिकेचा थरार सुरु आहे. या मालिकेतील पहिला कसोटी सामना मुल्तानमध्ये सुरु आहे. या सामन्यात पाकिस्तानचा कर्णधार शान मसूदने शानदार शतक झळकावलं आहे. हे त्याच्या कसोटी कारकिर्दीतील पाचवे शतक ठरले आहे. दरम्यान या शतकी खेळीसह त्याच्या नावे एका मोठ्या रेकॉर्डची नोंद झाली आहे.

शानच्या नावे मोठ्या रेकॉर्डची नोंद मुल्तानच्या मैदानावर सुरु असलेल्या या सामन्यात शान मसूदने शानदार सुरुवात केली. त्याने सुरुवातीपासूनच इंग्लंडच्या फलंदाजांचा चांगलाच समाचार घेतला. यासह त्याने १०२ चेंडूंचा सामना करत आपलं शतक पूर्ण केलं. हे कर्णधार म्हणून त्याच्या कसोटी कारकिर्दीतील पहिलंच शतक ठरलं आहे. तर कसोटी क्रिकेटमध्ये पाकिस्तानसाठी झळकावलेलं हे दुसरं सर्वात वेगवान शतक ठरलं आहे.

सर्वात वेगवान शतक

यजमान संघातील फलंदाजाकडून कसोटीत सर्वात वेगवान शतक झळकावण्याचा रेकॉर्ड हा पाकिस्तानचा माजी फलंदाज मिस्बाह उल हकच्या नावावर आहे. २०१४ मध्ये फलंदाजी करताना मिस्बाह उल हकने ५६ चेंडूंचा सामना करत पाकिस्तानसाठी कसोटीतील सर्वात वेगवान शतक झळकावलं होतं. शान मसूदच्या खेळीबद्दल बोलायचं झालं, तर त्याने १७७ चेंडूंचा सामना करत १५१ धावांची शानदार खेळी केली. या खेळीदरम्यान त्याने २ गगनचुंबी षटकार आणि १३ चौकार खेचले.

या सामन्याबद्दल बोलायचं झालं, तर पाकिस्तानने या सामन्यात नाणेफेक जिंकून प्रथम फलंदाजीचा निर्णय घेतला. प्रथम फलंदाजीसाठी आलेल्या पाकिस्तानकडून अब्दुल्ला शफीकने १०२ धावांची शानदार खेळी केली. तर शान मसूदने १५१ धावा केल्या. या खेळीच्या बळावर पाकिस्तानने पहिल्याच दिवशी ३०० धावांचा आकडा गाठला आहे.