पाकिस्तान अन् गोलंदाजाचं वेगळच कनेक्शन आहे. या पाकिस्तानने आतंरराष्ट्रीय क्रिकेटला अनेक दिग्गज गोलंदाज दिले आहेत. आता पाकिस्तानचा फ्युचर स्टारचा एक व्हिडिओ सोशल मीडियावर धुमाकूळ घालतोय. व्हायरल होत असलेल्या व्हिडिओमध्ये एक लहान मुलगा हुबेहूब जसप्रीत बुमराह स्टाईल गोलंदाजी करताना दिसतोय. जसप्रीत बुमराह हा आंतरराष्ट्रीय दिग्गज गोलदाजांपैकी एक आहे. भारतीय संघाला टी-२० वर्ल्डकप जिंकून देण्यात त्याने मोलाची भूमिका बजावली होती. या स्पर्धेत त्याची सामनावीर म्हणून निवड करण्यात आली होती.

या लहान मुलाचा व्हिडिओ पाकिस्तानचा दिग्गज खेळाडू वसीम अक्रमने आपल्या सोशल मीडिया अकाऊंटवर शेअर केला आहे. या व्हिडिओवर त्यांनी कॅप्शन म्हणून,' वाह जी वाह...या मुलाची गोलंदाजी अॅक्शन तर पाहा. हुबेहूब जसप्रीत बुमराहसारखी. माझ्यासाठी तर हा व्हिडिओ ऑफ द डे आहे. क्रिकेटला कुठलीही सीमा नसते."

हा व्हिडिओ शेअर करत वसीम अक्रम यांनी जसप्रीत बुमराहचं कौतुकही केलं आहे. त्यांच्या मते बुमराह या काळातील सर्वात खतरनाक गोलंदाज आहे. भारतीय संघाला विजय मिळवून देण्यात जसप्रीत बुमराहने मोलाची भूमिका बजावली होती. ज्यावेळी भारतीय संघ अडचणीत असायचा त्यावेळी जसप्रीत बुमराह संघाला विकेट्स काढून द्यायचा. फायनलमध्येही त्याने मोक्याच्या क्षणी विकेट काढून दिली होती.

आयसीसी टी-२० वर्ल्डकप झाल्यानंतर भारतीय संघातील स्टार खेळाडू सध्या व्हॅकेशन मोडमध्ये आहेत. विराट कोहली आणि रोहित शर्मा परदेशात आहेत. तर जसप्रीत बुमराहला भारताच्या झिम्बाब्वे दौऱ्यातून विश्रांती देण्यात आली होती. नुकतेच जसप्रीत बुमराह आणि त्याची पत्नी संजना गणेशन यांनी राधिका मर्चंट आणि अनंत अंबानीच्या विवाह सोहळ्याला हजेरी लावली होती.