आयपीएलच्या १९ व्या सिझनला आजपासून सुरूवात होणार आहे. आज रॉयल चॅलेंजर्स विरूद्ध सनरायझर्स हैदराबाद यांच्यात सामना रंगणार आहे. मात्र आयपीएलला सुरुवात होण्याआधीच चेन्नई सुपर किंग्सच्या चाहत्यांसाठी एक वाईट बातमी समोर आलीये. टीमचा सर्वात अनुभवी आणि महत्त्वाचा खेळाडू एमएस धोनी सुरुवातीच्या काही सामन्यांमधून बाहेर झाला आहे.

मिळालेल्या माहितीनुसार, धोनीच्या काफमध्ये समस्या जाणवत असल्याने तो सुमारे दोन आठवडे खेळू शकणार नाहीये. शनिवारी 28 मार्च रोजी सीएसके फ्रँचायझीने याबाबत अधिकृत माहिती दिलीये. त्यामुळे सिझनच्या सुरुवातीच्या टप्प्यातच टीमला मोठा धक्का बसला आहे.

रिपोर्टनुसार, धोनी या सिझनमधील पहिले चार सामने खेळण्याची शक्यता कमी आहे. दरम्यान त्याच्या अनुपस्थितीत विकेटकीपिंगची जबाबदारी कोण सांभाळणार याकडे सर्वांचं लक्ष लागलंय. यासाठी संजू सॅमसन किंवा उर्विल पटेल यांच्यापैकी एका खेळाडूला संधी मिळण्याची शक्यता वर्तवण्यात आली आहे.

कोणत्या सामन्यांमध्ये खेळणार नाही धोनी?

• 30 मार्च – राजस्थान रॉयल्स विरुद्ध चेन्नई सुपर किंग्स

• 3 एप्रिल – चेन्नई सुपर किंग्स विरुद्ध पंजाब किंग्स

• 5 एप्रिल – आरसीबी विरुद्ध सीएसके

• 11 एप्रिल – सीएसके विरुद्ध दिल्ली

आंतरराष्ट्रीय क्रिकेटमधून निवृत्ती

धोनीने 2020 साली आंतरराष्ट्रीय क्रिकेटमधून निवृत्ती घेतली होती. त्यानंतर तो सातत्याने फक्त आयपीएलमध्ये खेळतोय. मागील सिझनमध्ये त्याने सर्व 14 सामने खेळले होते आणि 135 पेक्षा जास्त स्ट्राइक रेटने 196 रन्स केले होते केल्या होते. ऋतुराज गायकवाड दुखापतीमुळे बाहेर गेल्यावर त्याने पुन्हा कर्णधारपदाची जबाबदारीही सांभाळली होती.

दरम्यान आता सीएसकेला आपल्या सर्वात मोठ्या स्टार आणि अनुभवी खेळाडूशिवाय सुरुवातीचा टप्पा पार करावा लागणार आहे. त्यामुळे धोनीशिवाय टीम कशी कामगिरी करते हे पाहावं लागणार आहे.