Ind Vs Eng : कसोटी मालिकेतील तिसरा सामना लॉर्ड्समध्ये सुरु आहे. या सामन्यातील तिसऱ्या दिवशी केएल राहुल चमकला आहे. केएल राहुलने लॉर्ड्सवर शतक ठोकले आहे. मालिकेतील हे केएल राहुलचे दुसरे शतक आहे. सध्या तो चांगल्याच फॉर्ममध्ये दिसत आहे. आज तिसऱ्या दिवशी भारताची फलंदाजी सुरु झाल्यानंतर केएल राहुल आणि यशस्वी जैस्वाल ही जोडी मैदानात उतरली. जैस्वाल लवकर बाद झाला. त्यानंतर करुण नायर पाठोपाठ शुभमन गिलची विकेट पडली. एका बाजूने विकेट्स पडत असताना केएल राहुल टिकून खेळला. तिसऱ्या दिवशी रिषभ पंतच्या साथीने केएल राहुलने चांगली भागीदारी केली.

आज (१२ जुलै) लॉर्ड्स कसोटी सामन्याचा तिसरा दिवस आहे. काल (११ जुलै) इंग्लंडचा संघ ३८७ धावांवर सर्वबाद झाला होता. त्यानंतर भारतीय सलामी जोडी मैदानात उतरली. दिवसाअखेरीस भारताने १४५ धावा केल्या. यशस्वी जैस्वाल (१३ धावा), करुण नायर (४० धावा) आणि कॅप्टन शुभमन गिल (१६ धावा) अशा प्रकारे ३ विकेट्स पडल्या. त्यानंतर केएल राहुल आणि रिषभ पंत यांनी खेळ सावरला.

लीड्सच्या मैदानावर पहिल्या भारत विरुद्ध इंग्लंड कसोटी सामन्याच्या दुसऱ्या डावात केएल राहुलने शतक केले होते. त्याने १३७ धावांची दमदार खेळी केली होती. एकूण कसोटी मालिकेमध्ये केएल राहुल चांगल्या फॉर्ममध्ये दिसत आहे. फक्त फलंदाजीच नाही, तर क्षेत्ररक्षणातही तो चांगला खेळ करत आहे. लॉर्ड्स कसोटीतील केएल राहुल आणि रिषभ पंत यांच्या भागीदारीमुळे भारत सध्या मजबूत स्थितीत आहे.

तिसऱ्या कसोटीत आतापर्यंत काय घडलं?

भारत विरुद्ध इंग्लंड लॉर्ड्स कसोटी सामन्यात इंग्लंडने टॉस जिंकत प्रथम फलंदाजी करण्याचा निर्णय घेतला. इंग्लंडचा डाव ३८७ धावांवर संपला. इंग्लंडकडून जो रूटने शतकीय कामगिरी केली. जेमी स्मिथ आणि ब्रायडन कार्स यांनी अर्धशतकीय खेळी केली. भारताकडून जसप्रीत बुमराहने सर्वाधिक ५ विकेट्स घेतल्या. त्याच्यापाठोपाठ मोहम्मद सिराज आणि नितीशकुमार रेड्डी यांनी प्रत्येकी २-२ गडी बाद केले. रवींद्र जडेजाने एक विकेट घेतली.