इंडियन प्रीमियर लीगच्या १९व्या हंगामातील ४३वा साखळी सामना जयपूरच्या सवाई मानसिंग स्टेडियमवर झाला. राजस्थान रॉयल्स आणि दिल्ली कॅपिटल्स दोन्ही संघ आमनेसामने होते. या सामन्यात दिल्ली कॅपिटल्स संघाने ७ गडी राखत रॉयल विजय मिळवला. राजस्थान रॉयल्सचा कर्णधार रियान परागने नाणेफेक जिंकून प्रथम फलंदाजी करण्याचा निर्णय घेतला. आरआरच्या संघाने २० षटकांत ६ गडी गमावून २२५ धावा केल्या. दिल्ली कॅपिटल्सने हे लक्ष्य १९.१ षटकांत ३ गडी गमावून पूर्ण केले.

राजस्थान रॉयल्स संघाने दिलेल्या २२६ धावांचा पाठलाग करताना दिल्ली कॅपिटल्सच्या सलामी जोडीने जबरदस्त कामगिरी केली. केएल राहुल आणि पथुम निस्संका या सलामीच्या जोडीने पहिल्या विकेटसाठी ११० धावांची भागीदारी करून भक्कम सुरुवात करून दिली. निस्संकाने ३३ चेंडूंमध्ये ६२ धावा केल्या. तेथून पुढे केएल राहुल आणि नितीश राणा यांनी धावगती मंदावू न देता डावाला पुढे नेले. त्यांनी दुसऱ्या विकेटसाठी ६१ धावांची भागीदारी केली.

नितीश राणा ३३ धावांवर बाद झाला, तर केएल राहुलने ७५ धावांची शानदार खेळी केली. दिल्लीने १७७ धावांवर तीन गडी गमावल्यानंतर ट्रिस्टन स्टब्स आणि आशुतोष शर्मा यांनी दिल्ली कॅपिटल्सला विजयाकडे नेण्याची जबाबदारी घेतली. यांनी चौथ्या विकेटसाठी २३ चेंडूंमध्ये ४९ धावांची भागीदारी करून संघाला या सामन्यात विजय मिळवून दिला. या सामन्यात स्टब्सने १८, तर आशुतोषने नाबाद २५ धावा केल्या. राजस्थान रॉयल्सकडून जोफ्रा आर्चर, तुषार देशपांडे आणि रवींद्र जडेजा यांनी प्रत्येकी एक बळी घेतला.

राजस्थान रॉयल्सची सामन्याची सुरुवात खराब झाली. धावसंख्या अवघी १२ असताना त्यांचे दोन्ही सलामीचे फलंदाज तंबूत परतले. त्यानंतर रियान पराग आणि ध्रुव जुरेल यांनी डाव सावरला. त्यांनी ५९ चेंडूंमध्ये तिसऱ्या विकेटसाठी १०२ धावांची वेगवान भागीदारी करून संघाला सामन्यात प्राण ओतले. या सामन्यात ४२ धावा करून जुरेल पॅव्हेलियनमध्ये परतला, तर परागने ९० धावांची शानदार खेळी केली.

डावाच्या शेवटच्या षटकांमध्ये फलंदाजीला आलेल्या डोनावन फरेराने अवघ्या १४ चेंडूंमध्ये सहा षटकार आणि दोन चौकारांसह नाबाद ४७ धावा करून राजस्थानची धावसंख्या २०० च्या पुढे नेण्यात महत्त्वाची भूमिका बजावली. तर दिल्ली कॅपिटल्सच्या गोलंदाजांमध्ये मिचेल स्टार्कने तीन बळी घेतले, तर काईल जेमिसन, अक्षर पटेल आणि टी नटराजन यांनी प्रत्येकी एक बळी घेतला.