आयपीएल २०२५ स्पर्धेसाठी होणारे मेगा ऑक्शन येत्या २४ आणि २५ नोव्हेंबरला होणार आहे. या ऑक्शनसाठी एकूण १५७४ खेळाडूंनी नाव नोंदवलं होतं. यापैकी ५७४ खेळाडूंची ऑक्शनसाठी निवड करण्यात आली आहे. या ५७४ खेळाडूंवर बोली लावली जाणार आहे. दरम्यान यावेळी मेगा ऑक्शनमध्ये युवा खेळाडूंचा बोलबाला पाहायला मिळणार आहे.

वैभव सूर्यवंशी

वैभव सूर्यवंशी या लिलावासाठी नाव नोंदणी करणारा सर्वात युवा खेळाडू ठरला. प्रथम श्रेणी क्रिकेटमध्ये बिहारकडून खेळणारा वैभव अवघ्या १३ वर्षांचा आहे. गेल्या महिन्यात तो भारतीय अंडर १९ संघातून ऑस्ट्रेलियाविरुद्ध युथ कसोटी मालिका खेळण्यासाठी मैदानात उतरला होता.

या मालिकेतील एका सामन्यात त्याने अवघ्या ५८ चेंडूत शतकी खेळी करत सर्वांचं लक्ष वेधून घेतलं होतं. ही दमदार कामगिरी पाहता फ्रेंचायझी त्याला आपल्या संघात घेण्याचा नक्कीच प्रयत्न करू शकतात.

आयुष म्हात्रे

मुंबईचा वंडर बॉय आयुष्य म्हात्रेने इराणी ट्रॉफीत मुंबईसाठी पदार्पण केलं. मात्र या स्पर्धेत त्याला हवी तशी कामगिरी करता आली नाही. त्यानंतर रणजी ट्रॉफी स्पर्धेत त्याचा क्लास पाहायला मिळाला. महाराष्ट्राविरुद्ध खेळताना त्याने ५२ आणि १७६ धावांची खेळी केली. या १७ वर्षीय खेळाडूला चेन्नई सुपर किंग्जने ट्रायलसाठी बोलवलं होतं.

हार्दिक राज

हार्दिक राज या १८ वर्षीय अष्टपैलू खेळाडूने कर्नाटकमध्ये झालेल्या महाराजा ट्रॉफीत दमदार कामगिरी केली होती. या स्पर्धेत फलंदाजी करताना त्याने ७ डावात १५५ धावा केल्या होत्या. यादरम्यान त्याने १ अर्धशतक झळकावलं होतं.

फलंदाजीसह गोलंदाजीतही त्याचा बोलबाला पाहायला मिळाला होता. त्याने गोलंदाजीत ७ गडी बाद केले होते. त्याची अष्टपैलू कामगिरी पाहून फ्रेंचायझी त्याला संघात घेण्यासाठी पैशांचा पाऊस पाडू शकतात.

आंद्रे सिद्धार्थ

तामिळनाडूचा १८ वर्षीय फलंदाज आंद्रे सिद्धार्थने देशांतर्गत क्रिकेटमध्ये दमदार कामगिरी करुन दाखवली आहे. मधल्या फळीत फलंदाजी करताना या फलंदाजाने तामिळनाडू प्रीमियर लीग आणि बुची बाबू ट्रॉफीत दमदार फलंदाजी केली होती. त्याने या स्पर्धेत ३८, ६६,५५, ४१,९४ आणि ७८ धावांची खेळी केली.