IPL 2025 मधील ६७ वा सामना गुजरात टायटन्स आणि चेन्नई सुपर किंग्स यांच्यामध्ये खेळला गेला. पॉईंट्स टेबलवर शेवटच्या स्थानावर असणाऱ्या चेन्नईच्या संघाने टेबल टॉपर्स गुजरात टायटन्सचा पराभव केला आहे. या पराभवाचा परिणाम गुजरातच्या नेट रन रेटवर पडला आहे. चेन्नईच्या विजयाचा फायदा प्लेऑफमध्ये क्वालिफाय झालेल्या इतर संघांना होणार असल्याचे म्हटले जात आहे. सध्याच्या घडीने नेट रन रेट पाहता मुंबई (१.२९२) सर्वात वर आहे. त्यामागे पंजाब (०.३२७), गुजरात (०.२५४) आणि सर्वात शेवटी बंगळुरूचा संघ (०.२५५) आहे. आता उद्या पंजाबविरुद्धचा सामना मुंबईने जर जिंकला तर, मुंबई टॉप २ मध्ये जाईल.

नरेंद्र मोदी स्टेडियमवर गुजरात आणि चेन्नई हे दोन संघ आमनेसामने आले. चेन्नईचा कर्णधार महेंद्रसिंह धोनीने टॉस जिंकला आणि प्रथम फलंदाजी करण्याचा निर्णय घेतला. २० ओव्हर्समध्ये चेन्नई सुपर किंग्सने ५ विकेट्स गमावून २३० धावा केल्या. डेव्हॉन कॉनवे आणि डेवाल्ड ब्रेविस यांनी अर्धशतकीय खेळी केली.

सलामीसाठी आलेल्या आयुष्य म्हात्रेने २०० च्या स्ट्राईक रेटने १७ चेंडूंमध्ये ३४ धावा केल्या. डेव्हॉन कॉनवेने ५२ धावा आणि डेवाल्ड ब्रेविसने ५७ धावा केल्या. शिवम दुबे आणि रवींद्र जडेजा यांनीही चांगली साथ दिली. सर्व फलंदाजांनी मिळून चेन्नई सुपर किंग्सचा डाव २३० धावांपर्यंत नेला. दुसऱ्या बाजूला प्रसिद्ध कृष्णाने सर्वाधिक २ विकेट्स घेतल्या.

२३१ धावांचे आव्हान गाठताना गुजरातचे फलंदाज मैदानात उतरले. कर्णधार शुभमन गिल १३ धावांवर माघारी परतला. त्याच्या पाठोपाठ जोस बटलर, शेरफन रुदरफोर्ड बाद झाले. त्यानंतर हळूहळू गुजरातचे सर्व खेळाडू एकामागे एक बाद होऊ लागले. साई सुदर्शनने सर्वाधिक ४१ धावा केल्या. पण चेन्नईच्या गोलंदाजांसमोर गुजरातचे फलंदाज टिकू शकले नाही. १४७ धावांवर गुजरातने डाव गुंडाळला. चेन्नईकडून अन्शुल कंबोज आणि नूर मोहम्मद यांनी प्रत्येकी ३ गडी बाद केले. रवींद्र जडेजानेही २ विकेट्स घेतल्या.