सध्या आयपीएलचा रणसंग्राम अंतीम टप्प्यात येऊन ठेपलाय. गुजरातचा संघ अंतीम सामन्यासाठी पात्र ठरलाय. आता प्रतिक्षा दुसऱ्या संघाची आहे. परंतु आयपीएल संपल्यानंतर लगेचंच भारतीय संघाला आफ्रिकेविरुद्ध टी-20 (IND vs SA) मालिका खेळायची आहे. त्यासाठी बीसीसीआयने मोठा निर्णय घेतला आहे. आयपीएलमध्ये 2022 (IPL 2022) खेळलेल्या खेळाडूंनी आणि आफ्रिकेविरुद्ध संघात स्थान मिळालेल्यांनी आपली फिटनेस टेस्ट द्यायची आहे. बीसीसीआयने केएल राहुलच्या नेतृत्वाखालील संघाला 5 जून रोजी NCA मध्ये फिटनेस टेस्टसाठी हजर राहण्यास सांगितले आहे. (Latest Cricket News Marathi)

''दक्षिण आफ्रिका मालिकेसाठी सर्व खेळाडूंनी एनसीएमध्ये हजर राहायचे आहे. हे महत्त्वाचे आहे कारण काही खेळाडूंच्या फिटनेसवरती प्रश्नचिन्ह आहे. हर्षल पटेलला अजून टाके आहेत त्यामुळे तो ठिक आहे की नाही हे ठरवावे लागणार आहे.'' असे बीसीसीआयने म्हटले आहे.

18 सदस्यीय भारतीय संघ आयपीएल 2022 संपल्यानंतर 5 जून किंवा त्यापूर्वी बेंगळुरू येथील राष्ट्रीय क्रिकेट अकादमीमध्ये एकत्र येईल. एनसीएचे संचालक व्हीव्हीएस लक्ष्मण या सर्व गोष्टींकडे लक्ष ठेवतील आणि सर्व खेळाडूंची फिटनेस टेस्ट करुन घेतील. बेंगळुरुवरुन सर्व 9 जून रोजी होणाऱ्या पहिल्या टी-20 साठी 7 जून रोजी दिल्लीला जातील. राहुल द्रविड या संघासोबत असणार आहे.

Edited By: Pravin Dhamale