भारत आणि बांगलादेश यांच्यातील टी -२० मालिका नुकतीच समाप्त झाली आहे. कसोटी मालिकेत २-० ने धूळ चारल्यानंतर टी -२० मालिकेतही भारतीय संघाने बांगलादेशचा सुपडा साफ केला. आता भारतीय संघासमोर न्यूझीलंडचं आव्हान असणार आहे. दोन्ही संघांमध्ये ३ कसोटी सामन्यांची मालिका होणार आहे. दरम्यान कसा राहिलाय दोन्ही संघांचा रेकॉर्ड? जाणून घ्या.

भारत आणि न्यूझीलंडचा हेड टू हेड रेकॉर्ड

कसोटी क्रिकेटमध्ये न्यूझीलंडविरुद्ध खेळताना भारतीय संघाचं पारडं जड राहिलंय. आतापर्यंत दोन्ही संघ ३५ वेळेस आमनेसामने आले आहेत. यादरम्यान भारतीय संघाने २२ सामने जिंकले आहेत. तर न्यूझीलंडला १३ सामने जिंकता आलेत आहेत. तर २७ सामने ड्रॉ राहिले आहेत.

भारतात कसा राहिलाय रेकॉर्ड?

भारतात खेळताना भारतीय संघाचा रेकॉर्ड दमदार राहिला आहे. २०१२ नंतर भारतीय संघाने भारतात खेळताना एकही मालिका गमावलेली नाही. भारतात खेळताना भारतीय संघाने न्यूझीलंडविरुद्ध १७ कसोटी सामने जिंकले आहेत. तर न्यूझीलंडविरुद्ध भारतात खेळताना भारतीय संघाने एकही कसोटी मलिका गमावलेली नाही. त्यामुळे भारतीय संघाचा हा रेकॉर्ड न्यूझीलंडचं टेन्शन वाढवणारा आहे. या कसोटी मालिकेत भारतीय संघाचं पारडं जड राहणार यात काहीच शंका नाही.

भारतीय संघासाठी अतिशय महत्वाची मालिका

ही मालिका भारतीय संघासाठी अतिशय महत्वाची असणार आहे. सध्या भारतीय संघ वर्ल्ड टेस्ट चॅम्पियनशिपच्या गुणतालिकेत अव्वल स्थानी आहे. मात्र अजूनही हा संघ फायनलसाठी पात्र ठरलेला नाही. भारतीय संघाला इथून पुढे ८ कसोटी सामने खेळायचे आहेत. जर फायनलमध्ये प्रवेश करायचा असेल तर कुठल्याही परिस्थितीत ८ पैकी ५ सामने जिंकावे लागणार आहे.