Ind vs Aus Match : चॅम्पियन्स ट्रॉफी २०२५ चा पहिला उपांत्य फेरीतील सामना भारत आणि ऑस्ट्रेलिया यांच्यात सुरु आहे. सामन्यात टॉस जिंकून ऑस्ट्रलियाने फलंदाजी करण्याचा निर्णय घेतला. ५० षटकामध्ये ऑस्ट्रेलियाच्या संघाने २६४ धावा केल्या. दरम्यान सामन्याच्या ३२ व्या षटकामध्ये एका चुकीमुळे फिरकीपटू कुलदीप यादवला ओरडा पडला.

कुलदीप यादव हा ३२ वे षटकात गोलंदाजी करत होता. त्या दरम्यान कुलदीपने टाकलेल्या चेंडूवर स्टीव स्मिथने मिड विकेटच्या दिशेने जोरदार शॉट मारला. तेथे उभ्या असलेल्या विराट कोहलीने चेंडू पकडला आणि विकेटच्या दिशेने जोरात फेकला. स्वत:कडे येणारा चेंडू कुलदीपने सोडला. पुढे चेंडू कव्हर्सवर उभ्या असलेल्या रोहित शर्माकडे गेली.

कुलदीपने चेंडू न पकडल्याने विराट कोहलीला खूप राग आला. त्यानंतर रोहित शर्मानेही कुलदीप यादवला उद्देशून उद्गार काढले. ही घटना स्टेडियममधील कॅमेऱ्यांमध्ये कैद झाली. व्हिडीओमध्ये चेंडू सोडल्याने रागात विराट कोहली आणि रोहित शर्मा यांच्या तोंडून अपशब्द निघाल्याचे पाहायला मिळाले. हा व्हिडीओ सोशल मीडियावर व्हायरल होत आहे.

चॅम्पियन्स ट्रॉफी २०२५ मधला आजचा उपांत्य फेरीतील सामना भारत आणि ऑस्ट्रेलिया या दोन्ही संघांसाठी महत्त्वपूर्ण आहे. आजचा सामना जो संघ जिंकेल तो अंतिम सामना खेळेल. दरम्यान या सामन्यामध्ये भारताचे पारडे जड असल्याचे म्हटले जात आहे. पण तरीही ऑस्ट्रेलिया सामन्यात कधीही कमबॅक करु शकते असे चाहते म्हणत आहेत.