भारत आणि ऑस्ट्रेलिया या दोन्ही संघामध्ये ५ कसोटी सामन्यांची मालिका सुरू आहे. या मालिकेतील आतापर्यंत ३ कसोटी सामने खेळले गेले आहेत. ही मालिका सध्या १-१ ने बरोबरीत आहे. तर मालिकेतील चौथा कसोटी सामना मेलबर्नमध्ये रंगणार आहे. या सामन्याला येत्या २६ डिसेंबरपासून सुरुवात होणार आहे. हा सामना भारतीय वेळेनुसार सकाळी ५ वाजता सुरू होईल.

हा सामना बॉक्सिंग डे सामना असणार आहे. भारतीय संघाचा रेकॉर्ड पाहिला तर गेल्या १२ वर्षात भारताने एकही बॉक्सिंग डे कसोटी सामना गमावलेला नाही. त्यामुळे यावेळी भारतीय संघ हा रेकॉर्ड कायम ठेवण्याच्या प्रयत्नात असणार आहे.

मेलबर्न कसोटी सामना हा भारतीय संघातील प्रमुख फलंदाजांसाठी अतिशय महत्वाचा असणार आहे. गेल्या काही सामन्यांमध्ये कर्णधार रोहित शर्मा पूर्णपणे फ्लॉप ठरला आहे. तर विराटने पहिल्या सामन्यात शतक झळकावलं, पण पुढील दोन्ही सामन्यांमध्ये तो स्वस्तात माघारी परतला.

पर्थमध्ये झालेल्या दुसऱ्या कसोटीत विराटने शानदार शतकी खेळी केली होती. त्यानंतर पुढील कसोटीत त्याला ७ आणि ११ धावा करता आल्या. तर मालिकेतील तिसऱ्या सामन्यात तो पूर्णपणे फ्लॉप ठरला.

या सामन्यात त्याला अवघ्या ३ धावा करता आल्या. तर दुसरीकडे कर्णधार रोहितला ३ डावात अवघ्या १९ धावा करता आल्या आहेत. त्यामुळे मेलबर्न कसोटीत या दोन्ही दिग्गज फलंदाजांची खरी कसोटी लागणार आहे. आता पुढील सामन्यात हे फलंदाज कशी कामगिरी करतात हे पाहणं महत्वाचं ठरणार आहे.

मालिका १-१ ने बरोबरीत

भारत आणि ऑस्ट्रेलिया यांच्यात सुरू असलेली कसोटी मालिका सध्या १-१ ने बरोबरीत आहे. मालिकेतील पहिला सामना पर्थमध्ये पार पडला होता. या सामन्यात भारताने २९५ धावांनी विजय मिळवला होता. त्यानंतर मालिकेतील दुसरा सामना ॲडलेडमध्ये पार पडला. या सामन्यात भारतीय संघाला १० गडी राखून पराभवाचा सामना करावा लागला. आता गाबाच्या मैदानावर झालेला सामना हा ड्रॉ राहिला.