IND VS AUS 2nd Test:ऑस्ट्रेलिया विरुध्द भारत या दोन्ही संघामध्ये ४ कसोटी सामन्यांच्या मालिकेतील दुसरा कसोटी सामना सुरू आहे. या सामन्यातील तिसऱ्याच दिवशी भारतीय गोलंदाजांची जोरदार कामगिरी पाहायला मिळाली आहे. ऑस्ट्रेलिया संघाचा दुसरा डाव अवघ्या ११३ धावांवर संपुष्टात आला आहे. हा सामना जिंकण्यासाठी भारतीय संघाला ११५ धावांची आवश्यकता आहे.(Latest Sports Updates)

नाणेफेक जिंकून प्रथम फलंदाजी करण्याचा निर्णय घेणाऱ्या ऑस्ट्रेलिया संघाने पहिल्या डावात २६३ धावा केल्या होत्या. मात्र या डावात ऑस्ट्रेलियाच्या फलंदाजांना सुर गवसला नाही. ऑस्ट्रेलिया संघाकडून ट्रेविस हेडने सर्वाधिक ४३ धावांची खेळी केली.

तर मार्नस लाबूशेनने ३५ धावांचे योगदान दिले. याशिवाय इतर कुठल्याही फलंदाजाला हवी तशी कामगिरी करता आली नाही. या फ्लॉप कामगिरीमुळेच ऑस्ट्रेलियाचा दुसरा डाव अवघ्या ११३ धावांवर आटोपला.

भारतीय गोलंदाजांची दमदार कामगिरी..

भारतीय संघातील फिरकी गोलंदाजांसमोर ऑस्ट्रेलियाचे फलंदाज नतमस्तक होताना दिसून आले आहेत. या डावात देखील अश्विन आणि जडेजाची जोडी ऑस्ट्रेलिया संघावर भारी पडली. या डावात रवींद्र जडेजाने ४२ धावा खर्च करत ७ गडी बाद केले. तर आर अश्विनने ५९ धावा खर्च करत ३ गडी बाद केले. या सामन्यातील पहिल्या डावात आर अश्विनने ३ तर जडेजाने देखील ३ गडी बाद केले होते.