आयसीसीने आगामी टी -२० वर्ल्डकप २०२४ स्पर्धेसाठी प्राईज मनीची घोषणा केली आहे. यावेळी आयसीसीचा बजेट ९३.५१ कोटी रुपये इतका असणार आहे. ही एक विक्रमी रक्कम असून, यापूर्वी कधीच इतकी रक्कम ठेवण्यात आली नव्हती. भारतात पार पडलेल्या वनडे वर्ल्डकप २०२३ स्पर्धेसाठी ८२.९३ कोटी इतकी प्राईज मनी ठेवण्यात आली होती.

कोणाला किती रक्कम मिळणार?

आयसीसीने सोमवारी( ३ जून) या विक्रमी रकमेची घोषणा केली आहे. यानुसार विजेत्या संघाला २०.३६ कोटी रुपये दिले जाणार आहेत. तर उपविजेत्या संघाला १०.६४ कोटी रुपये दिले जाणार आहेत. यासह सेमीफायनलमध्ये पराभूत होणाऱ्या संघांना ६.५४ कोटी रुपये दिले जाणार आहेत. यापूर्वी आयसीसीच्या कुठल्याच स्पर्धेत इतकी मोठी रक्कम दिली गेली नव्हती. यामागचं सर्वात मोठं कारण म्हणजे, यावेळी २० संघ टी -२० वर्ल्डकप खेळण्यासाठी मैदानात उतरले आहेत.

ही रक्कम केवळ विजेत्या किंवा उपविजेत्या संघांना नाही, तर स्पर्धेत सहभागी होणाऱ्या प्रत्येक संघांमध्ये विभागली जाणार आहे. सुपर ८ मध्ये प्रवेश करणाऱ्या संघांना प्रत्येकी ३.८ कोटी रुपये दिले जाणार आहेत. तर ९ ते १२ व्या स्थानी असणाऱ्या संघांना २.५ कोटी, १३ ते २० स्थानावर असणाऱ्या संघांना १.८७ कोटी रुपये दिले जाणार आहेत. यासह प्रत्येक सामना जिंकणाऱ्या संघांना प्रत्येकी २५.८९ लाख रुपये दिले जाणार आहेत.

आयसीसी टी -२० वर्ल्डकप २०२४ स्पर्धेला २ जूनपासून सुरुवात झाली आहे. भारतीय संघाचा पहिला सामना ५ जून रोजी आयर्लंडविरुद्ध होणार आहे. ९ जून रोजी भारत आणि पाकिस्तान हे दोन्ही संघ आमने सामने असणार आहेत.