Rishabh Pant, ICC Test Rankings: भारत- न्यूझीलंड कसोटी मालिका सुरु असताना आयसीसीने कसोटी रँकिंगची घोषणा केली आहे. बुधवारी जाहीर करण्यात आलेल्या यादीत रिषभ पंतने मोठी झेप घेतली आहे. या यादीत रिषभ पंतने विराट कोहलीलाही मागे सोडलं आहे. न्यूझीलंडविरुद्ध झालेल्या पहिल्या कसोटीत रिषभ पंतने ९९ धावांची शानदार खेळी केली होती. दरम्यान रिषभ पंत या यादीत सहाव्या स्थानी पोहोचला आहे.

कोण कितव्या स्थानी ?

इंग्लंडचा स्टार फलंदाज जो रुटने आपलं अव्वल स्थान कायम ठेवलं आहे. रुटने पाकिस्तानविरुद्ध सुरु असलेल्या सामन्यातही चांगली कामगिरी केली आहे. तर विराट कोहली आठव्या स्थानी सरकला आहे. तर यशस्वी जयस्वाल चौथ्या स्थानी कायम आहे. भारताचा कर्णधार रोहित शर्मालाही फटका बसला आहे. तो श्रीलंकेच्या दुमिथ करुणारत्नेसह संयुक्तरित्या १५ व्या स्थानी आहे.

रचिनची मोठी झेप

भारत आणि न्यूझीलंड यांच्यातील पहिल्या कसोटीत रचिन रविंद्रची बॅट चांगली चमकली. त्याने भारतीय गोलंदाचांचा चांगलाच समाचार घेत शतकी खेळी केली. या खेळीचा त्याला आयसीसी रँकिंगमध्ये चांगलाच फायदा झाला आहे. या सामन्यापूर्वी रचिन ३६ व्या स्थानी होता. आता तो १८ व्या स्थानी पोहोचला आहे. तर शतकी खेळी करणारा डेवोन कॉन्व्हे ३६ व्या स्थानी पोहोचला आहे.

गोलंदाजांमध्ये बुमराह अव्वल

भारत आणि न्यूझीलंड यांच्यातील पहिल्या कसोटीत गोलंदाजी करताना ८ गडी बाद करणाऱ्या मॅट हेनरीचाही चांगलाच फायदा झाला आहे. हेनरी गोलंदाजांच्या यादीत ९ व्या स्थानी पोहोचला आहे. तर पाकिस्तान विरुद्ध इंग्लंड यांच्यातील दुसऱ्या सामन्यात शानदार गोलंदाजी करणारा पाकिस्तानचा गोलंदाज नोमान अली १७ व्या स्थानी पोहोचला आहे. तर साजिद खान ५० व्या स्थानी पोहोचला आहे. भारताचा अनुभवी गोलंदाज जसप्रीत बुमराह या यादीत अव्वल स्थानी आहे. तर आर अश्विन दुसऱ्या स्थानी आहे.