भारतीय संघाचा कर्णधार रोहित शर्माने टी-२० वर्ल्डकप झाल्यानंतर टी-२० आंतरराष्ट्रीय क्रिकेटमधून निवृत्ती जाहीर केली आहे. रोहितने निवृत्ती जाहीर केल्यानंतर बीसीसीआयने नव्या कर्णधाराचा शोध घ्यायला सुरुवात केली आहे. या पदासाठी सूर्यकुमार यादव आणि हार्दिक पंड्याच्या नावाची चर्चा होत आहे. तर सूर्यकुमार यादवचं नाव आघाडीवर असल्याचं म्हटलं जात आहे.

झिम्बाब्वेला ४-१ ने लोळवल्यानंतर भारतीय संघ आता श्रीलंका दौऱ्यावर रवाना होणार आहे. या दौऱ्यावर गौतम गंभीर पहिल्यांदाच मुख्य प्रशिक्षकाच्या भूमिकेत दिसणार आहे. तर टी-२० संघाला नवा कर्णधार मिळणार आहे. .या दौऱ्यासाठी वेळापत्रक जाहीर करण्यात आलं असून २७ जूलैपासून टी-२० आणि वनडे मालिकेला प्रारंभ होणार आहे. या मालिकेसाठी बुधवारी (१७ जुलै) भारतीय संघाची घोषणा करण्यात येणार होती. मात्र ही बैठक पुढे ढकलण्यात आली आहे.

गौतम गंभीर आणि बीसीसीआयचे अधिकारी यांच्याच अनऑफिशियल चर्चा झाली. या चर्चेदरम्यान रोहितनंतर टी-२० संघाचा कर्णधार कोण? या विषयावर चर्चा झाली असेल. गंभीरने थेट सूर्यकुमार यादवचं नाव नाही घेतलं. मात्र गंभीरला कर्णधार म्हणून सूर्याच हवा आहे.

बीसीसीआयच्या एका अधिकाऱ्याने हिन्दुस्तान टाईम्सला म्हटले की, ' गंभीरने कॉलवर असताना थेट सूर्यकुमार यादवचं नाव घेतलं नाही. मात्र त्याने स्पष्ट केलंय की, त्याला अशा कर्णधारासोबत काम करायचं आहे, जो वर्कलोडमध्ये अडकून राहणार नाही.' यावरुन त्याने नकळत सूर्यकुमार यादवला कर्णधार बनवणार असल्याचा इशारा दिला आहे.

हार्दिक पंड्या आणि सूर्यकुमार यादव या दोघांनाही नेतृत्वाचा अनुभव आहे. रोहित शर्माच्या अनुपस्थितीत हार्दिक पंड्याकडे भारतीय संघाची जबाबदारी सोपवण्यात आली होती. यासह टी-२० वर्ल्डकप २०२४ स्पर्धेतही त्याच्याकडे उपकर्णधारपदाची जबाबदारी सोपवण्यात आली होती. तर रोहित आणि हार्दित दोघेही संघाबाहेर असताना सूर्यकुमार यादवकडे संघाची जबाबदारी सोपवण्यात आली होती.