भारतीय संघाचा माजी फलंदाज गौतम गंभीरची भारतीय संघाच्या मुख्य प्रशिक्षकपदी नेमणूक करण्यात आली आहे. राहुल द्रविड यांचा मुख्य प्रशिक्षकपदाचा कार्यकाळ संपल्यानंतर गौतम गंभीरने ही जबाबदारी स्वीकारली आहे. भारतीय संघ या महिन्याच्या शेवटच्या आठवड्यात श्रीलंका दौऱ्यावर रवाना होणार आहे. या दौऱ्यावर गौतम गंभीर मुख्य प्रशिक्षकाच्या भूमिकेत दिसून येणार आहे. दरम्यान आपला कार्यकाळ सुरु होण्यापूर्वी गौतम गंभीरने भारतीय खेळाडूंना इशारा दिला आहे.

गौतम गंभीर हा आपल्या स्पष्ट वक्तव्यांमुळे नेहमीच चर्चेत असतो. यापूर्वीही अनेकदा त्याने स्पष्ट वक्तव्य केली आहेत. त्याने स्पष्टपणे म्हटलं आहे की, एखादा खेळाडू जर फिट असेल, तर त्याने तिन्ही फॉरमॅटमध्ये खेळायला हवं.

गौतम गंभीरने एका स्पोर्ट्स चॅनलला दिलेल्या मुलाखतीत म्हटले की, जर तुम्ही खेळण्यासाठी सक्षम असाल , तर तिन्ही फॉरमॅटमध्ये खेळायला हवं. तर एखादा खेळाडू दुखापतग्रस्त असेल, तर त्याने जावं आणि फिट होऊन पुन्हा कमबॅक करावं. एका खेळाडूने एकच फॉरमॅट खेळावं यावर माझा विश्वास नाही. खेळाडू जर दुखापतग्रस्त असेल, तर खेळाडूच्या दुखापतीवर उपाययोजना करु.'

तसेच तो पुढे म्हणाला की, ' प्रोफेशनल क्रिकेट खेळत असताना तुमचा कार्यकाळ हा खूप लहान असतो. त्यामुळे प्रत्येकाला वाटतं की त्याने जास्तीत जास्त सामने खेळावं. जर एखादा खेळाडू चांगल्या फॉर्ममध्ये असेल, तर त्याने तिन्ही फॉरमॅटमध्ये खेळावं.' राहुल द्रविड यांचा मुख्य प्रशिक्षकपदाचा कार्यकाळ संपल्यानंतर गंभीने हा पदभार सांभाळला आहे.

सपोर्ट स्टाफमध्ये कोणाचा समावेश?

गौतम गंभीर मुख्य प्रशिक्षकाच्या भूमिकेत असणार आहे. तर फलंदाजी प्रशिक्षक म्हणून अभिषेक नायरचं नाव आघाडीवर आहे. तर मॉर्ने मॉर्कल हा गौतम गंभीरला गौलंदाजी प्रशिक्षक म्हणून हवा असल्याचा दावा माध्यमातील वृत्तात केला जात आहे.