मुंबई : सध्या इंडियन प्रीमिअर लीग अर्थात आयपीएल स्पर्धेचा (IPL 2022) १५ वा हंगाम जोमात सुरू आहे. आज आयपीएलमध्ये रोहित शर्माच्या (Rohit Sharma) मुंबई इंडियन्सचा सामना केएल राहूलच्या (KL Rahul) लखनौ सुपर जायंट्स (MI vs LSG) विरुद्ध होणार आहे. दरम्यान, हा सामना सुरू होण्यापूर्वी क्रिडा विश्वातून एक दु:खद बातमी समोर आली आहे. मुंबईचे माजी वेगवान गोलंदाज राजेश वर्मा (Rajesh Varma) यांचं हृदयविकाराच्या धक्क्याने निधन झालं आहे. (Former Mumbai Fast Bowler Rajesh Verma Passes Away)

राजेश यांनी वयाच्या ४० व्या वर्षी अखेरचा श्वास घेतला. २००७-०८ साली मुंबईच्या संघाने रणजी ट्रॉफी (Mumbai Ranji Trophy) जिंकली होती, त्या संघात राजेश वर्मा सदस्य होते. राजेश वर्मा यांचे सहकारी आणि माजी खेळाडू भाविन ठक्कर यांनी राजेश यांच्या निधनाच्या वृत्ताला दुजोरा दिला आहे.

राजेश वर्मा यांची कारकिर्द

२००२ साली राजेश यांनी प्रथम श्रेणी क्रिकेटमध्ये पदार्पण केलं होतं. त्यांनी ७ प्रथमश्रेणी सामने खेळले आहे. २००८ साली पंजाबच्या संघाविरुद्ध मुंबईच्या ब्रेबॉर्न स्टेडियमवर त्यांनी शेवटचा सामना खेळला होता. राजेश यांनी ७ प्रथमश्रेणी सामन्यात एकूण २३ विकेट्स घेतल्या आहेत. याशिवाय त्यांनी ११ लिस्ट ए सामन्यात २० विकेट मिळवल्या होत्या. ९७ धावा देत ५ विकेट ही त्यांची सर्वोत्तम कामगिरी होती.

Edited By - Satish Daud