राहुल द्रविड यांचा प्रशिक्षकपदाचा कार्यकाळ संपल्यानंतर गौतम गंभीरने भारतीय संघाच्या मुख्य प्रशिक्षकपदाची जबाबदारी हाती घेतली. आता बीसीसीआय गौतम गंभीरच्या कोचिंग स्टाफमध्ये बदल करण्याच्या विचारात आहे.

भारतीय संघाला स्पेशल फलंदाजी प्रशिक्षक मिळणार असल्याची माहिती समोर येत आहे. दरम्यान ही बातमी बाहेर येताच, इंग्लंडच्या माजी फलंदाजाने भारतीय संघाला प्रशिक्षण देण्याची ईच्छा व्यक्त केली आहे.

भारतीय संघाला प्रशिक्षण देण्यासाठी इच्छुक

भारतीय संघाला नवा फलंदाजी प्रशिक्षक मिळणार असल्याची चर्चा जोर धरु लागली आहे. या चर्चेला हवा मिळताच, इंग्लंडचा माजी फलंदाज केविन पीटरसनने पोस्ट शेअर करत रिअॅक्शन दिली आहे. सोशल मीडियावर, भारतीय संघाला नवा फलंदाजी प्रशिक्षक मिळणार असल्याची जोरदार चर्चा रंगली आहे.

दरम्यान, या पोस्टवर रिअॅक्शन देत पीटरसनने लिहिले, 'उपलब्ध..', आता खरंच बीसीसीआय फलंदाजी प्रशिक्षकाची नियु्क्ती करणार का? जर फलंदाजी प्रशिक्षकाची नियुक्ती केली, तर पीटरनसला ही जबाबदारी दिली जाणार का? हे पाहणं महत्वाचं ठरणार आहे.

गंभीर- पीटरसन एकत्र येणार?

गौतम गंभीर आणि केविन पीटरसन यांना एकमेकांविरुद्ध खेळण्याचा चांगलाच अनुभव आहे. मात्र दोघांनी एकत्र काम केलेलं नाही. दोघेही आपल्या आक्रमकतेसाठी ओळखले जातात. जर पीटरसनने ही जबाबदारी स्वीकारली तर याचा फायदा विराटला होऊ शकतो.

कारण विराट आणि पीटरसन दोघेही चांगले मित्र आहेत. दोघांनाही एकत्र खेळण्याचा अनुभव आहे. यासह जेव्हा जेव्हा विराटवर टीका केली गेली आहे,तेव्ह पीटरसनने पुढाकार घेत विराटची पाठराखण केली आहे.

आयसीसी टी-२० वर्ल्डकप २०२४ स्पर्धेनंतर राहुल द्रविड यांचा प्रशिक्षकपदाचा कार्यकाळ संपला. त्यानंतर मुख्य प्रशिक्षक म्हणून गौतम गंभीरची निवड करण्यात आली. गौतम गंभीरच्या कोचिंग स्टाफमध्ये रायन टेन डोईशे, अभिषेक शर्मा आणि मॉर्ने मॉर्केलचा समावेश आहे.