भारत आणि ऑस्ट्रेलिया या दोन्ही संघांमध्ये ५ कसोटी सामन्यांची मालिका सुरु आहे. या मालिकेत आतापर्यंत ३ कसोटी सामने खेळले गेले आहेत. तर मालिकेतील चौथा कसोटी सामना मेलबर्नच्या मैदानावर रंगणार आहे.

हा सामना दोन्ही संघांसाठी अतिशय खास असणार आहे. कारण हा सामना बॉक्सिंग डे कसोटी सामना असणार आहे. तुम्हालाही प्रश्न पडलाच असेल ना, हा बॉक्सिंग डे नेमका काय प्रकार आहे? बॉक्सिंग डे शब्द कुठून आला? जाणून घ्या.

बॉक्सिंग डे म्हणजे काय?

इंग्लंड, ऑस्ट्रेलिया, दक्षिण आणि न्यूझीलंड सारख्या देशांमध्ये ख्रिसमसच्या वेळी बॉक्सिंग डे साजरा केला जातो. अशी धारणा आहे की, २५ डिसेंबरला सुट्टी न घेता काम करणाऱ्यांना २६ डिसेंबरला सुट्टी आणि गिफ्ट दिले जाते. त्यामुळेच २६ डिसेंबरला बॉक्सिंग डे असं म्हणतात. या दिवसाची सुरुवात २६ डिसेंबरपासून होते.

पहिला बॉक्सिंग डे सामना केव्हा खेळला गेला होता.

बॉक्सिंग डे कसोटीला खूप जूना इतिहास आहे. पहिला बॉक्सिंग डे कसोटी सामना १९५० मध्ये खेळला गेला होता. हा सामना इंग्लंड आणि ऑस्ट्रेलिया यांच्यात झालेल्या अॅशेस मालिकेदरम्यान खेळला गेला होता.

केवळ ऑस्ट्रेलिया आणि इंग्लंड नव्हे, तर दक्षिण आफ्रिका आणि न्यूझीलंडमध्येही बॉक्सिंग डे कसोटी सामना खेळला जातो. मेलबर्नला बॉक्सिंग डे कसोटीचा खूप जूना इतिहास आहे. कारण पहिला वहिला बॉक्सिंग डे कसोटी सामन्याचा थरार मेलबर्नमध्ये रंगला होता.

कसा राहिलाय भारतीय संघाचा रेकॉर्ड?

भारतीय संघाने आतापर्यंत ९ बॉक्सिंग डे कसोटी सामने खेळले आहेत. भारतीय संघाने १९८५ मध्ये पहिला बॉक्सिंग डे खेळला होता. या सामन्याचा निकाल लागला नव्हता. हा सामना ड्रॉ राहिला होता. या ९ पैकी भारतीय संघाला केवळ २ सामने जिंकता आले आहेत.